17. යො චක්ඛුන්ද්රියං පරිජානිස්සති සො දොමනස්සින්ද්රියං පජහිස්සතී’ති: ද්වෙ පුග්ගලා චක්ඛුන්ද්රියං පරිජානිස්සන්ති, නො ච දොමනස්සින්ද්රියං පජහිස්සන්ති. පඤ්ච පුග්ගලා චක්ඛුන්ද්රියඤ්ච පරිජානිස්සන්ති, දොමනස්සින්ද්රියඤ්ච පජහිස්සන්ති.

යො වා පන දොමනස්සින්ද්රියං පජහිස්සති සො චක්ඛුන්ද්රියං පරිජානිස්සතී’ති: ආමන්තා.

යො චක්ඛුන්ද්රියං පරිජානිස්සති සො අනඤ්ඤාතඤ්ඤස්සාමීතින්ද්රියං භාවෙස්සතී’ති: ඡ පුග්ගලා චක්ඛුන්ද්රියං පරිජානිස්සන්ති, නො ච අනඤ්ඤාතඤ්ඤස්සාමීතින්ද්රියං භාවෙස්සන්ති. යෙ පුථුජ්ජනා මග්ගං පටිලභිස්සන්ති තෙ චක්ඛුන්ද්රියඤ්ච පරිජානිස්සන්ති, අනඤ්ඤාතඤ්ඤස්සාමීතින්ද්රියඤ්ච භාවෙස්සන්ති.

යො වා පන අනඤ්ඤාතඤ්ඤස්සාමීතින්ද්රියං භාවෙස්සති සො චක්ඛුන්ද්රියං පරිජානිස්සතී’ති: ආමන්තා.

යො චක්ඛුන්ද්රියං පරිජානිස්සති සො අඤ්ඤින්ද්රියං භාවෙස්සතී’ති: ආමන්තා.

යො වා පන අඤ්ඤින්ද්රියං භාවෙස්සති සො චක්ඛුන්ද්රියං පරිජානිස්සතී’ති: ආමන්තා.

යො චක්ඛුන්ද්රියං පරිජානිස්සති සො අඤ්ඤාතාවින්ද්රියං සච්ඡිකරිස්සතී’ති: ආමන්තා.

යො වා පන අඤ්ඤාතාවින්ද්රියං සච්ඡිකරිස්සති සො චක්ඛුන්ද්රියං පරිජානිස්සතී’ති: අග්ගමග්ගසමඞ්ගී අඤ්ඤාතාවින්ද්රියං සච්ඡිකරිස්සති, නො ච චක්ඛුන්ද්රියං පරිජානිස්සති. සත්ත පුග්ගලා අඤ්ඤාතාවින්ද්රියඤ්ච සච්ඡිකරිස්සන්ති, චක්ඛුන්ද්රියඤ්ච පරිජානිස්සන්ති.

18. යො දොමනස්සින්ද්රියං පජහිස්සති සො අනඤ්ඤාතඤ්ඤස්සාමීතින්ද්රියං භාවෙස්සතී’ති: චත්තාරො පුග්ගලා දොමනස්සින්ද්රියං පජහිස්සන්ති, නො ච අනඤ්ඤාතඤ්ඤස්සාමීතින්ද්රියං භාවෙස්සන්ති. යෙ පුථුජ්ජනා මග්ගං පටිලභිස්සන්ති තෙ දොමනස්සින්ද්රියඤ්ච පජහිස්සන්ති, අනඤ්ඤාතඤ්ඤස්සාමීතින්ද්රියඤ්ච භාවෙස්සන්ති.

යො වා පන අනඤ්ඤාතඤ්ඤස්සාමීතින්ද්රියං භාවෙස්සති සො දොමනස්සින්ද්රියං පජහිස්සතී’ති: ආමන්තා.

යො දොමනස්සින්ද්රියං පජහිස්සති සො අඤ්ඤින්ද්රියං භාවෙස්සතී’ති : ආමන්තා.

යො වා පන අඤ්ඤින්ද්රියං භාවෙස්සති සො දොමනස්සින්ද්රියං පජහිස්සතී’ති: ද්වෙ පුග්ගලා අඤ්ඤින්ද්රියං භාවෙස්සන්ති, නො ච දොමනස්සින්ද්රියං පජහිස්සන්ති. පඤ්ච පුග්ගලා අඤ්ඤින්ද්රියඤ්ච භාවෙස්සන්ති, දොමනස්සින්ද්රියඤ්ච පජහිස්සන්ති.

යො දොමනස්සින්ද්රියං පජහිස්සති සො අඤ්ඤාතාවින්ද්රියං සච්ඡිකරිස්සතී’ති: ආමන්තා.

යො වා පන අඤ්ඤාතාවින්ද්රියං සච්ඡිකරිස්සති සො දොමනස්සින්ද්රියං පජහිස්සතී’ති: තයො පුග්ගලා අඤ්ඤාතාවින්ද්රියං සච්ඡිකරිස්සන්ති. නො ච දොමනස්සින්ද්රියං පජහිස්සන්ති. පඤ්ච පුග්ගලා අඤ්ඤාතාවින්ද්රියඤ්ච සච්ඡිකරිස්සන්ති, දොමනස්සින්ද්රියඤ්ච පජහිස්සන්ති.

19. යො අනඤ්ඤාතඤ්ඤස්සාමීතින්ද්රියං භාවෙස්සති සො අඤ්ඤින්ද්රියං භාවෙස්සතී’ති: ආමන්තා.

යො වා පන අඤ්ඤින්ද්රියං භාවෙස්සති සො අනඤ්ඤාතඤ්ඤස්සාමීතින්ද්රියං භාවෙස්සතී’ති: ඡ පුග්ගලා අඤ්ඤින්ද්රියං භාවෙස්සන්ති, නො ච අනඤ්ඤාතඤ්ඤස්සාමීතින්ද්රියං භාවෙස්සන්ති, යෙ පුථුජ්ජනා මග්ගං පටිලභිස්සන්ති තෙ අඤ්ඤින්ද්රියඤ්ච භාවෙස්සන්ති, අනඤ්ඤාතඤ්ඤස්සාමීතින්ද්රියඤ්ච භාවෙස්සන්ති.

යො අනඤ්ඤාතඤ්ඤස්සාමීතින්ද්රියං භාවෙස්සති සො අඤ්ඤාතාවින්ද්රියං සච්ඡිකරිස්සතී’ති: ආමන්තා.

යො වා පන අඤ්ඤාතාවින්ද්රියං සච්ඡිකරිස්සති සො අනඤ්ඤාතඤ්ඤස්සාමීතින්ද්රියං භාවෙස්සතී’ති: සත්ත පුග්ගලා අඤ්ඤාතාවින්ද්රියං සච්ඡිකරිස්සන්ති, නො ච අනඤ්ඤාතඤ්ඤස්සාමීතින්ද්රියං භාවෙස්සන්ති. යෙ පුථුජ්ජනා මග්ගං පටිලභිස්සන්ති තෙ අඤ්ඤාතාවින්ද්රියඤ්ච සච්ඡිකරිස්සන්ති, අනඤ්ඤාතඤ්ඤස්සාමීතින්ද්රියඤ්ච භාවෙස්සන්ති.

20. යො අඤ්ඤින්ද්රියං භාවෙස්සති සො අඤ්ඤාතාවින්ද්රියං සච්ඡිකරිස්සතී’ති: ආමන්තා.

යො වා පන අඤ්ඤාතාවින්ද්රියං සච්ඡිකරිස්සති සො අඤ්ඤින්ද්රියං භාවෙස්සතී’ති: අග්ගමග්ගසමඞ්ගී අඤ්ඤාතාවින්ද්රියං සච්ඡිකරිස්සති, නො ච අඤ්ඤින්ද්රියං භාවෙස්සති. සත්ත පුග්ගලා අඤ්ඤාතාවින්ද්රියඤ්ච සච්ඡිකරිස්සන්ති, අඤ්ඤින්ද්රියඤ්ච භාවෙස්සන්ති. (අනුලොමං).