54. පඤ්චක්ඛන්ධා: රූපක්ඛන්ධො, වෙදනාක්ඛන්ධො, සඤ්ඤාක්ඛන්ධො, සඞ්ඛාරක්ඛන්ධො, විඤ්ඤාණක්ඛන්ධො.

55. තත්ථ කතමො රූපක්ඛන්ධො:

එකවිධෙන රූපක්ඛන්ධො; සබ්බං රූපං න හෙතු, අහෙතුකං, හෙතුවිප්පයුත්තං, සප්පච්චයං, සඞ්ඛතං, රූපං, ලොකියං, සාසවං, සංයොජනියං, ගන්ථනීයං, ඔඝනීයං, යොගනීයං, නීවරණියං, පරාමට්ඨං, උපාදානියං, සංකිලෙසිකං, අබ්යාකතං, අනාරම්මණං, අචෙතසිකං, චිත්තවිප්පයුත්තං, නෙවවිපාකනවිපාකධම්මධම්මං, අසංකිලිට්ඨ සංකිලෙසිකං, න සවිතක්කසවිචාරං, න අවිතක්කවිචාරමත්තං, අවිතක්කඅවිචාරං, න පීතිසහගතං, න සුඛසහගතං, න උපෙක්ඛා සහගතං, නෙව දස්සනෙන න භාවනාය පහාතබ්බං, නෙව දස්සනෙන න භාවනාය පහාතබ්බහෙතුකං, නෙවාචයගාමි, නාපචයගාමි, නෙවසෙක්ඛං, නාසෙක්ඛං, පරිත්තං, කාමාවචරං, න රූපාවචරං, න අරූපාවචරං, පරියාපන්නං, නො අපරියාපන්නං, අනියතං, අනිය්යානිකං, උප්පන්නං, ඡහි විඤ්ඤාණෙහි විඤ්ඤෙය්යං, අනිච්චං, ජරාභිභුතං. එවං එකවිධෙන රූපක්ඛන්ධො.

56. දුවිධෙන රූපක්ඛන්ධො: අත්ථි රූපං උපාදා, අත්ථි රූපං නූපාදා. අත්ථි රූපං උපාදින්නං, අත්ථි රූපං අනුපාදින්නං. අත්ථි රූපං උපාදින්නුපාදානියං, අත්ථි රූපං අනුපාදින්නුපාදානියං. අත්ථි රූපං සනිදස්සනං, අත්ථි රූපං අනිදස්සනං අත්ථි රූපං සප්පටිඝං, අත්ථි රූපං අප්පටිඝං. අත්ථි රූපං ඉන්ද්රියං, අත්ථි රූපං න ඉන්ද්රියං. අත්ථි රූපං මහාභූතං, අත්ථි රූපං න මහාභූතං. අත්ථි රූපං විඤ්ඤත්ති, අත්ථි රූපං න විඤ්ඤත්ති. අත්ථි රූපං චිත්තසමුට්ඨානං, අත්ථි රූපං න චිත්තසමුට්ඨානං. අත්ථි රූපං චිත්තසහභු, අත්ථි රූපං න චිත්තසහභු. අත්ථි රූපං චිත්තානුපරිවත්ති, අත්ථි රූපං න චිත්තානුපරිවත්ති. අත්ථි රූපං අජ්ඣත්තිකං, අත්ථි රූපං බාහිරං. අත්ථි රූපං ඔළාරිකං, අත්ථි රූපං සුඛුමං. අත්ථි රූපං දූරෙ, අත්ථි රූපං සන්තිකෙ -පෙ- අත්ථි රූපං කබළිංකාරො ආහාරො, අත්ථි රූපං න කබළිංකාරො ආහාරො. එවං දුවිධෙන රූපක්ඛන්ධො (යථා රූපකණ්ඩෙ විභත්තං, තථා ඉධ විභජිතබ්බං.)

57. තිවිධෙන රූපක්ඛන්ධො: යං තං රූපං අජ්ඣත්තිකං තං උපාදා, යං තං රූපං බාහිරං අත්ථි උපාදා, අත්ථි නූපාදා. යං තං රූපං අජ්ඣත්තිකං තං උපාදින්නං, යං තං රූපං බාහිරං තං අත්ථි උපාදින්නං, අත්ථි අනුපාදින්නං. යං තං රූපං අජ්ඣත්තිකං තං උපාදින්නුපාදානියං, යං තං රූපං බාහිරං තං අත්ථි උපාදින්නුපාදානියං, අත්ථි අනුපාදින්නුපාදානියං. -පෙ- යං තං රූපං අජ්ඣත්තිකං තං න කබළිංකාරො ආහාරො, යං තං රූපං බාහිරං තං අත්ථි කබළිංකාරො ආහාරො, අත්ථි න කබළිංකාරො ආහාරො. එවං තිවිධෙන රූපක්ඛන්ධො.

58. චතුබ්බිධෙන රූපක්ඛන්ධො: යං තං රූපං උපාදා, තං අත්ථි උපාදින්නං, අත්ථි අනුපාදින්නං. යං තං රූපං නූපාදා, තං අත්ථි උපාදින්නං, අත්ථි අනුපාදින්නං. යං තං රූපං උපාදා, තං අත්ථි උපාදින්නනුපාදානියං, අත්ථි අනුපාදින්නුපාදානියං. යං තං රූපං නූපාදා, තං අත්ථි උපාදින්නනුපාදානියං, අත්ථි අනුපාදින්නුපාදානියං. යං තං රූපං උපාදා, තං අත්ථි සප්පටිඝං, අත්ථි අප්පටිඝං. යං තං රූපං නූපාදා තං අත්ථි සප්පටිඝං, අත්ථි අප්පටිඝං. යං තං රූපං උපාදා තං අත්ථි ඔළාරිකං අත්ථි සුඛුමං, යං තං රූපං නූපාදා තං අත්ථි ඔළාරිකං අත්ථි සුඛුමං, යං තං රූපං උපාදා තං අත්ථි දූරෙ, අත්ථි සන්තිකෙ. යං තං රූපං නූපාදා තං අත්ථි දූරෙ, අත්ථි සන්තිකෙ -පෙ- දිට්ඨං, සුතං, මුතං, විඤ්ඤාතං රූපං. එවං චතුබ්බිධෙන රූපක්ඛන්ධො.

59. පඤ්ච විධෙන රූපක්ඛන්ධො: පඨවීධාතු, ආපො ධාතු, තෙජොධාතු, වායොධාතු, යඤ්ච රූපං උපාදා. එවං පඤ්චවිධෙන රූපක්ඛන්ධො.

60. ඡබ්බිධෙන රූපක්ඛන්ධො: චක්ඛුවිඤ්ඤෙය්යං රූපං, සොතවිඤ්ඤෙය්යං රූපං, ඝානවිඤ්ඤාය්යං රූපං, ජිව්හාවිඤ්ඤෙය්යං රූපං, කායවිඤ්ඤෙය්යං රූපං, මනොවිඤ්ඤෙය්යං රූපං. එවං ඡබ්බිධෙන රූපක්ඛන්ධො.

61. සත්තවිධෙන රූපක්ඛන්ධො: චක්ඛුවිඤ්ඤෙය්යං රූපං, සොතවිඤ්ඤෙය්යං රූපං, ඝානවිඤ්ඤෙය්යං රූපං, ජිව්හාවිඤ්ඤෙය්යං රූපං, කායවිඤ්ඤෙය්යං රූපං, මනොධාතුවිඤ්ඤෙය්යං රූපං, මනොවිඤ්ඤාණධාතුවිඤ්ඤෙය්යං රූපං. එවං සත්තවිධෙන රූපක්ඛන්ධො.

62. අට්ඨවිධෙන රූපක්ඛන්ධො: චක්ඛුවිඤ්ඤෙය්යං රූපං, සොතවිඤ්ඤෙය්යං රූපං, ඝානවිඤ්ඤෙය්යං රූපං, ජිව්හාවිඤ්ඤෙය්යං රූපං, කායවිඤ්ඤෙය්යං රූපං, අත්ථි සුඛසම්ඵස්සං, අත්ථි දුක්ඛසම්ඵස්සං, මනොධාතුවිඤ්ඤෙය්යං රූපං, මනොවිඤ්ඤාණධාතුවිඤ්ඤෙය්යං රූපං, එවං අට්ඨවිධෙන රූපක්ඛන්ධො.

63. නවවිධෙන රූපක්ඛන්ධො: චක්ඛුන්ද්රියං, සොතින්ද්රියං, ඝානින්ද්රියං, ජිව්හින්ද්රියං, කායින්ද්රියං, ඉත්ථින්ද්රියං, පුරිසින්ද්රියං, ජීවිතින්ද්රියං, යඤ්ච රූපං න ඉන්ද්රියං. එවං නවවිධෙන රූපක්ඛන්ධො.

64. දසවිධෙන රූපක්ඛන්ධො: චක්ඛුන්ද්රියං, සොතින්ද්රියං, ඝානින්ද්රියං, ජිව්හින්ද්රියං, කායින්ද්රියං, ඉත්ථින්ද්රියං, පුරිසින්ද්රියං, ජීවිතින්ද්රියං, න ඉන්ද්රියං රූපං අත්ථි සප්පටිඝං, අත්ථි අප්පටිඝං. එවං දසවිධෙන රූපක්ඛන්ධො.

65. එකාදසවිධෙන රූපක්ඛන්ධො: චක්ඛායතනං, සොතායතනං, ඝානායතනං, ජිව්හායතනං, කායායතනං, රූපායතනං, සද්දායතනං, ගන්ධායතනං, රසායතනං, ඵොට්ඨබ්බායතනං, යඤ්ච රූපං අනිදස්සන අප්පටිඝං ධම්මායතනපරියාපන්නං. එවං එකාදසවිධෙන රූපක්ඛන්ධො. අයං වුච්චති රූපක්ඛන්ධො.