1. ස. පු: අමතාරම්මණං සඤ්ඤොජනන්ති.

ප. පටිඤ්ඤා: ආමන්තා.

ස. අනු: අමතං සඤ්ඤොජනියං ගන්ථනීයං ඔඝනීයං යොගනීයං නීවරණියං පරාමට්ඨං උපාදානියං සංකිලෙසියන්ති.

ප. පටි: න හෙවං වත්තබ්බෙ -පෙ-

ස. අනු: නනු අමතං අසඤ්ඤොජනියං අගන්ථනීයං -පෙ- අසංකිලෙසියන්ති.

ප. පටිඤ්ඤා: ආමන්තා.

අනු. ඨ: හඤ්චි අමතං අසඤ්ඤොජනියං -පෙ- අසංකිලෙසියං,

අනු. පා: නො ච වත රෙ වත්තබ්බෙ: අමතාරම්මණං සඤ්ඤොජනන්ති.

2. ස. පු: අමතං ආරබ්භ රාගො උප්පජ්ජතී’ති.

ප. පටිඤ්ඤා: ආමන්තා.

ස. අනු අමතං රාගට්ඨානියං රජනීයං කමනීයං මදනීයං බන්ධනීයං මුච්ඡනීයන්ති.

ප. පටි: න හෙවං වත්තබ්බෙ -පෙ-

ස. අනු: නනු අමතං න රාගට්ඨානියං න රජනීයං න කමනීයං න මදනීයං න බන්ධනීයං න මුච්ඡනීයන්ති.

ප. පටිඤ්ඤා: ආමන්තා.

අනු. ඨ: හඤ්චි අමතං න රාගට්ඨානියං න රජනීයං න කමනීයං න මදනීයං න බන්ධනීයං න මුච්ඡනීයං,

අනු. පා: නො ච වත රෙ වත්තබ්බෙ: “අමතං ආරබ්භ රාගො උප්පජ්ජතී”ති.

3. ස. පු: අමතං ආරබ්භ දොසො උප්පජ්ජතී’ති.

ප. පටිඤ්ඤා: ආමන්තා.

ස. අනු: අමතං දොසට්ඨානියං කොපට්ඨානියං පටිඝට්ඨානියන්ති.

ප. පටි: න හෙවං වත්තබ්බෙ -පෙ-

ස. අනු: නනු අමතං න දොසට්ඨානියං න කොපට්ඨානියං න පටිඝට්ඨානියන්ති.

ප. පටිඤ්ඤා: ආමන්තා.

අනු. ඨ: හඤ්චි අමතං න දොසට්ඨානියං න කොපට්ඨානියං න පටිඝට්ඨානියං,

අනු. පා නො ච වත රෙ වත්තබ්බෙ: අමතං ආරබ්භ දොසො උප්පජ්ජතී’ති

4. ස. පු: අමතං ආරබ්භ මොහො උප්පජ්ජතී’ති.

ප. පටිඤ්ඤා: ආමන්තා.

ස. අනු: අමතං මොහට්ඨානියං අඤ්ඤාණකරණං අචක්ඛුකරණං පඤ්ඤානිරොධියං විඝාතපක්ඛියං අනිබ්බානසංවත්තනියන්ති.

ප. පටි: න හෙවං වත්තබ්බෙ -පෙ-

ස. අනු: නනු අමතං න මොහට්ඨානියං න අඤ්ඤාණකරණං න අචක්ඛුකරණං පඤ්ඤාවුද්ධියං අවිඝාතපක්ඛියං නිබ්බානසංවත්තනියන්ති.

ප. පටිඤ්ඤා: ආමන්තා.

අනු. ඨ: හඤ්චි අමතං න මොහට්ඨානියං න අඤ්ඤාණකරණං -පෙ- නිබ්බානසංවත්තනියං,

අනු. පා: නො ච වත රෙ වත්තබ්බෙ: අමතං ආරබ්භ මොහො උප්පජ්ජතී”ති.

5. ස. පු: රූපං ආරබ්භ සඤ්ඤොජනා උප්පජ්ජන්ති. රූපං සඤ්ඤොජනියං ගන්ථනීයං -පෙ- සංකිලෙසියන්ති.

ප. පටිඤ්ඤා: ආමන්තා.