1. ස. පු: නියාමො අසඞ්ඛතො’ති.

ප. පටිඤ්ඤා: ආමන්තා.

ස. අනු: නිබ්බානං තාණං ලෙණං සරණං පරායනං අච්චුතං අමතන්ති.

ප. පටි: න හෙවං වත්තබ්බෙ -පෙ-

2. ස. පු: නියාමො අසඞ්ඛතො, නිබ්බානං අසඞ්ඛතන්ති.

ප. පටිඤ්ඤා: ආමන්තා.

ස. අනු: ද්වෙ අසඞ්ඛතානී’ති.

ප. පටි: න හෙවං වත්තබ්බෙ -පෙ-

3. ස. පු: ද්වෙ අසඞ්ඛතානී’ති.

ප. පටිඤ්ඤා: ආමන්තා.

ස. අනු: ද්වෙ තාණානි, ද්වෙ ලෙණානි, ද්වෙ සරණානි, ද්වෙ පරායනානි, ද්වෙ අච්චුතානි, ද්වෙ අමතානි, ද්වෙ නිබ්බානානී’ති.

ප. පටි: න හෙවං වත්තබ්බෙ -පෙ-

4. ස. පු: ද්වෙ නිබ්බානානී’ති.

ප. පටිඤ්ඤා: ආමන්තා.

ස. අනු: අත්ථී ද්වින්නං නිබ්බානානං උච්චනීචතා හීනප්පණිත්තා උක්කංසාවකංසො සීමා වා භෙදො වා රාජි වා අන්තරිකා වා’ති.

ප. පටි: න හෙවං වත්තබ්බෙ -පෙ-

5. ස. පු: නියාමො අසඞ්ඛතො’ති.

ප. පටිඤ්ඤා: ආමන්තා.

ස. අනු: අත්ථී කෙචි නියාමං ඔක්කමන්ති, පටිලභන්ති, උප්පාදෙන්ති, සමුප්පාදෙන්ති, උට්ඨාපෙන්ති, සමුට්ඨාපෙන්ති, නිබ්බත්තෙන්ති, අභිනිබ්බත්තෙන්ති, ජනෙන්ති, සඤ්ජෙනෙන්තී’ති.

ප. පටිඤ්ඤා: ආමන්තා.

ස. අනු: අත්ථී කෙචි අසඞ්ඛතං ඔක්කමන්ති පටිලභන්ති උප්පාදෙන්ති සමුප්පාදෙන්ති උට්ඨාපෙන්ති සමුට්ඨාපෙන්ති නිබ්බත්තෙන්ති අභිනිබ්බත්තෙන්ති ජනෙන්ති සඤ්ජෙනෙන්තී’ති.

ප. පටි: න හෙවං වත්තබ්බෙ -පෙ-

6. ස. පු: නියාමො අසඞ්ඛතො’ති.

ප. පටිඤ්ඤා: ආමන්තා.

ස. අනු: මග්ගො අසඞ්ඛතො’ති.

ප. පටි: න හෙවං වත්තබ්බෙ -පෙ-

7. ස. පු: මග්ගො සඞ්ඛතො’ති.

ප. පටිඤ්ඤා: ආමන්තා.

ස. අනු: නියාමො සඞ්ඛතො’ති.

ප. පටි: න හෙවං වත්තබ්බෙ -පෙ-

8. ස. පු: සොතාපත්තිනියාමො අසඞ්ඛතො’ති.

ප. පටිඤ්ඤා: ආමන්තා.

ස. අනු: සොතාපත්තිමග්ගො අසඞ්ඛතොති,

ප. පටි: න හෙවං වත්තබ්බෙ -පෙ-

9. ස. පු: සොතාපත්තිමග්ගො සඞ්ඛතො’ති.

ප. පටිඤ්ඤා: ආමන්තා.

ස. අනු: සොතාපත්තිනියාමො සඞ්ඛතො’ති.

ප. පටි: න හෙවං වත්තබ්බෙ -පෙ-