5. 6.
සම්මුතිඤාණකථා.
1. ස. පු: න වත්තබ්බං: සම්මුතිඤාණං සච්චාරම්මණඤ්ඤෙව න අඤ්ඤාරම්මණන්ති.
ප. පටිඤ්ඤා: ආමන්තා.
ප. අනු: නනු පඨවීකසිණසමාපත්තිං සමාපන්නස්ස අත්ථී ඤාණං, පඨවීකසිණඤ්ච සම්මුතිසච්චම්හි’ති.
ස. පටිඤ්ඤා: ආමන්තා.
අනු. ඨ: හඤ්චි පඨවීකසිණසමාපත්තිං සමාපන්නස්ස අත්ථී ඤාණං ‘පඨවීකසිණඤ්ච සම්මුතිසච්චම්හි,
අනු. පා: තෙන වත රෙ වත්තබ්බෙ: සම්මුතිඤාණං සච්චාරම්මණඤ්ඤෙ’ව න අඤ්ඤාරම්මණන්ති.
2. ප. පු: න වත්තබ්බං: සම්මුතිඤාණං සච්චාරම්මණඤ්ඤෙ’ව න අඤ්ඤාරම්මණන්ති.
ස. පටිඤ්ඤා: ආමන්තා.
ප. අනු: නනු ආපොකසිණං -පෙ- තෙජොකසිණං -පෙ- ගිලානපච්චය භෙසජ්ජපරික්ඛාරං දදන්තස්ස අත්ථී ඤාණං, ගිලානපච්චය භෙසජ්ජපරික්ඛාරො ච සම්මුතිසච්චම්හි’ති.
ස. පටිඤ්ඤා: ආමන්තා.
අනු. ඨ: හඤ්චි ගිලානපච්චයභෙසජ්ජපරික්ඛාරං දදන්තස්ස අත්ථී ඤාණං, ගිලානපච්චයභෙසජ්ජ පරික්ඛාරො ච සම්මුතිසච්චම්හි,
අනු. පා: තෙන වත රෙ වත්තබ්බෙ: සම්මුතිඤාණං සච්චාරම්මණඤ්ඤෙ’ව න අඤ්ඤාරම්මණන්ති.
3. ස. පු: සම්මුතිඤාණං සච්චාරම්මණඤ්ඤෙ’ව න අඤ්ඤාරම්මණන්ති.
ප. පටිඤ්ඤා: ආමන්තා.
ස. අනු: තෙන ඤාණෙන දුක්ඛං පරිජානාති. සමුදයං පජහති, නිරොධං සච්ඡිකරොතී, මග්ගං භාවෙතී’ති.
ප. පටි: න හෙවං වත්තබ්බෙ -පෙ-
සම්මුතිඤාණකථා නිට්ඨිතා.
5. 7.
චිත්තාරම්මණකථා.
1. ස. පු: චෙතොපරියායෙ ඤාණං චිත්තාරම්මණඤ්ඤෙ’ව න අඤ්ඤාරම්මණන්ති.
ප. පටිඤ්ඤා: ආමන්තා.
ස. අනු: නනු අත්ථී කොචි සරාගං චිත්තං සරාගං චිත්තන්ති පජානාතී’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී කොචි සරාගං චිත්තං සරාගං චිත්තන්ති පජානාති,
අනු. පා: නො ච වත රෙ වත්තබ්බෙ: චෙතොපරියායෙ ඤාණං චිත්තාරම්මණඤ්ඤෙ’ව න අඤ්ඤාරම්මණන්ති.
ස. අනු: නනු අත්ථී කොචි වීතරාගං චිත්තං -පෙ- සදොසං චිත්තං -පෙ- වීතදොසං චිත්තං -පෙ- සමොහං චිත්තං -පෙ- වීතමොහං චිත්තං -පෙ- සඞ්ඛිත්තං චිත්තං -පෙ- වික්ඛිත්තං චිත්තං -පෙ- මහග්ගතං චිත්තං -පෙ- අමග්ගහතං චිත්තං -පෙ- සඋත්තරං චිත්තං -පෙ- අනුත්තරං චිත්තං -පෙ- සමාහිතං චිත්තං -පෙ- අසමාහිතං චිත්තං -පෙ- විමුත්තං චිත්තං -පෙ- අවිමුත්තං චිත්තං අවිමුත්තං චිත්තංන්ති පජානාතී’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථී කොචි අවිමුත්තං චිත්තං අවිමුත්තං චිත්තන්ති පජානාති,
අනු. පා: නො ච වත රෙ වත්තබ්බෙ: චෙතොපරියායෙ ඤාණං චිත්තාරම්මණඤ්ඤෙ’ව න අඤ්ඤාරම්මණන්ති.
2. ස. පු: ඵස්සාරම්මණෙ ඤාණං වත්තබ්බං: චෙතොපරියායෙ ඤාණන්ති.
ප. පටිඤ්ඤා: ආමන්තා.
අනු. ඨ: හඤ්චි ඵස්සාරම්මණෙ ඤාණං වත්තබ්බං: චෙතොපරියායෙ ඤාණං,
අනු. පා: නො ච වත රෙ වත්තබ්බෙ: චෙතොපරියායෙ ඤාණං චිත්තාරම්මණඤ්ඤෙ’ව අඤ්ඤාරම්මණන්ති.