1. ස. පු: සෙඛස්ස අසෙඛඤාණං අත්ථී’ති.

ප. පටිඤ්ඤා: ආමන්තා.

ස. අනු: සෙඛො අසෙඛං ධම්මං ජානාති, පස්සති, දිට්ඨං විදිතං සච්ඡිකතං උපසම්පජ්ජ විහරති, කායෙන ඵුසිත්වා විහරතී’ති.

ප. පටි: න හෙවං වත්තබ්බෙ -පෙ-

ස. අනු: නනු සෙඛො අසෙඛං ධම්මං න ජානාති, න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා විහරතී’ති.

ප. පටිඤ්ඤා: ආමන්තා.

අනු. ඨ: හඤ්චි සෙඛො අසෙඛං ධම්මං න ජානාති, න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා න විහරති,

අනු. පා: නො ච වත රෙ වත්තබ්බෙ ‘සෙඛස්ස අසෙඛං ඤාණං අත්ථී’ති.

2. ස. පු: අසෙඛස්ස අසෙඛං ඤාණං අත්ථී, අසෙඛො අසෙඛං ධම්මං ජානාති, පස්සති, දිට්ඨං විදිතං සච්ඡිකතං උපසම්පජ්ජ විහරති, කායෙන ඵුසිත්වා විහරතී’ති.

ප. පටිඤ්ඤා: ආමන්තා.

ස. අනු: සෙඛස්ස අසෙඛං ඤාණං අත්ථී, සෙඛො අසෙඛං ධම්මං ජානාති, පස්සති, දිට්ඨං විදිතං සච්ඡිකතං උපසම්පජ්ජ විහරති, කායෙන ඵුසිත්වා විහරතී’ති.

ප. පටි: න හෙවං වත්තබ්බෙ -පෙ-

3. ස. පු: සෙඛස්ස අසෙඛං ඤාණං අත්ථී, සෙඛො අසෙඛං ධම්මං න ජානාති, න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා විහරතී’ති.

ප. පටිඤ්ඤා: ආමන්තා.

ස. අනු: අසෙඛස්ස අසෙඛං ඤාණං අත්ථී, අසෙඛො අසෙඛං ධම්මං න ජානාති, න පස්සති, අදිට්ඨං අවිදිතං අසච්ඡිකතං න උපසම්පජ්ජ විහරති, න කායෙන ඵුසිත්වා විහරතී’ති.

ප. පටි: න හෙවං වත්තබ්බෙ -පෙ-

4. ස. පු: සෙඛස්ස අසෙඛං ඤාණං අත්ථී’ති.

ප. පටිඤ්ඤා: ආමන්තා.

ස. අනු: ගොත්රභුනො පුග්ගලස්ස සොතාපත්තිමග්ගෙ ඤාණං අත්ථී’ති.

ප. පටි: න හෙවං වත්තබ්බෙ -පෙ-

ස. අනු: සොතාපත්තිඵලසච්ඡිකිරියාය පටිපන්නස්ස පුග්ගලස්ස සොතාපත්තිඵලෙ ඤාණං අත්ථී’ති.

ප. පටි: න හෙවං වත්තබ්බෙ -පෙ-

ස. අනු: සකදාගාමිඵලසච්ඡිකිරියාය -පෙ- අනාගාමිඵලසච්ඡිකිරියාය -පෙ- අරහත්තසච්ඡිකිරියාය පටිපන්නස්ස පුග්ගලස්ස අරහත්තෙ ඤාණං අත්ථී’ති.

ප. පටි: න හෙවං වත්තබ්බෙ -පෙ-

5. ප. පු: න වත්තබ්බං සෙඛස්ස අසෙඛං ඤාණං අත්ථී”ති.

ස. පටිඤ්ඤා: ආමන්තා.

ප. අනු: නනු අයස්මා ආනන්දො සෙඛො “භගවා උළාරො”ති ජානාති. “සාරිපුත්තො ථෙරො, මහා මොග්ගල්ලානො ථෙරො උළාරො”ති ජානාතී’ති.

ස. පටිඤ්ඤා: ආමන්තා.

අනු. ඨ: හඤ්චි ආයස්මා අනන්දො සෙඛො “භගවා උළාරො”ති ජානාති. “සාරිපුත්තො ථෙරො, මහාමොග්ගල්ලානො ථෙරො උළාරො”ති ජානාති,

අනු. පා: තෙන වත රෙ වත්තබ්බෙ ‘සෙඛස්ස අසෙඛං ඤාණං අත්ථී’ති.