තෙවීසතිමො වග්ගො
23. 1.
එකාධිප්පාය කථා.
1. ස. පු: එකාධිප්පායෙන මෙථුනො ධම්මො පතිසෙවිතබ්බො’ති.
ප. පටිඤ්ඤා: ආමන්තා.
ස. අනු: එකාධිප්පායෙන අස්සමණෙන හොතබ්බං අභික්ඛුනා හොතබ්බං ජින්නමූලෙන හොතබ්බං පාරාජිකෙන හොතබ්බන්ති.
ප. පටි: න හෙවං වත්තබ්බෙ -පෙ-
2. ස. පු: එකාධිප්පායෙන මෙථුනො ධම්මො පතිසෙවිතබ්බො’ති.
ප. පටිඤ්ඤා: ආමන්තා.
ස. අනු: එකාධිප්පායෙන පාණො හන්තබ්බො -පෙ- අදින්නං ආදියිතබ්බං -පෙ- මුසා භණිතබ්බා -පෙ- පිසුණං භණිතබ්බං -පෙ- ඵරුසං භණිතබ්බං -පෙ- සම්ඵං පලපිතබ්බං -පෙ- සන්ධි ඡෙදිතබ්බො -පෙ- නිල්ලොපං කාතබ්බං -පෙ- එකාගාරිකං කාතබ්බං -පෙ- පරිපන්ථෙ ඨාතබ්බං -පෙ- පරදාරො ගන්තබ්බො -පෙ- ගාමඝාතො කාතබ්බො -පෙ- නිගමඝාතො කාතබ්බො’ති.
ප. පටි: න හෙවං වත්තබ්බෙ -පෙ-
එකාධිප්පායකථා නිට්ඨිතා.
23. 2.
අරහන්තවණ්ණ කථා.
1. ස. පු: අරහන්තානං වණ්ණෙන අමනුස්සා මෙථුනං ධම්මං පතිසෙවන්තී’ති.
ප. පටිඤ්ඤා: ආමන්තා.
ස. අනු: අරහන්තානං වණ්ණෙන අමනුස්සා පාණං හනන්තී -පෙ- අදින්නං ආදියන්ති -පෙ- මුසා භණන්ති -පෙ- පිසුණං භණන්ති -පෙ- ඵරුසං භණන්ති -පෙ- සම්ඵං පලපන්ති -පෙ- සන්ධිං ඡින්දන්ති -පෙ- නිල්ලොපං හරන්ති -පෙ- එකාගාරිකං කරොන්ති -පෙ- පරිපන්ථෙ තිට්ඨන්ති -පෙ- පරදාරං ගච්ඡන්ති -පෙ- ගාමඝාතං කරොන්ති -පෙ- නිගමඝාතං කරොන්තී’ති.
ප. පටි: න හෙවං වත්තබ්බෙ -පෙ-
අරහන්තවණ්ණකථා නිට්ඨිතා.