දුතියො වග්ගො
2. 1.
පරූපහාරකථා.
1. ස. පු: අත්ථී අරහතො අසුචි සුක්කවිසට්ඨි’ති.
ප. පටිඤ්ඤා: ආමන්තා.
ස. අනු: අත්ථී අරහතො රාගො කාමරාගො කාමරාගපරියුට්ඨානං කාමරාග සඤ්ඤොජනං කාමොඝො කාමයොගො කාමච්ඡන්දනීවරණන්ති.
ප. පටි: න හෙවං වත්තබ්බෙ -පෙ-
2. ස. පු: නත්ථී අරහතො රාගො කාමරාගො කාමරාගපරියුට්ඨානං කාමරාගසඤ්ඤොජනං කාමොඝො කාමයොගො කාමච්ඡන්දනීවරණන්ති.
ප. පටිඤ්ඤා: ආමන්තා.
අනු. ඨ: හඤ්චි නත්ථී අරහතො රාගො කාමරාගො කාමරාගපරියුට්ඨානං කාමරාගසඤ්ඤොජනං කාමොඝො කාමයොගො කාමච්ඡන්දනීවරණං.
අනු. පා: නො ච වත රෙ වත්තබ්බෙ: “අත්ථී අරහතො අසුචි සුක්කවිසට්ඨී”ති.
3. ස. පු: අත්ථී පුථුජ්ජනස්ස අසුචි සුක්කවිසට්ඨි, අත්ථී තස්ස රාගො කාමරාගො කාමරාගපරියුට්ඨානං කාමරාගසඤ්ඤොජනං කාමොඝො කාමයොගො කාමච්ඡන්දනීවරණන්ති.
ප. පටිඤ්ඤා: ආමන්තා.
ස. අනු: අත්ථී අරහතො අසුචි සුක්කවිසට්ඨි, අත්ථී තස්ස රාගො කාමරාගො කාමරාගපරියුට්ඨානං -පෙ- කාමච්ඡන්දනීවරණන්ති.
ප. පටි: න හෙවං වත්තබ්බෙ -පෙ-
4. ස. පු: අත්ථි අරහතො අසුචි සුක්කවිසට්ඨි, නත්ථී තස්ස රාගො කාමරාගො කාමරාගපරියුට්ඨානං -පෙ- කාමච්ඡන්දනීවරණන්ති.
ප. පටිඤ්ඤා: ආමන්තා.
ස. අනු: අත්ථී පුථුජ්ජනස්ස අසුචි සුක්කවිසට්ඨි, නත්ථී තස්ස රාගො කාමරාගො කාමරාගපරියුට්ඨානං -පෙ- කාමච්ඡන්දනීවරණන්ති.
ප. පටි: න හෙවං වත්තබ්බෙ -පෙ-
5. ස. පු: අත්ථී අරහතො අසුචි සුක්කවිසට්ඨි’ති.
ප. පටිඤ්ඤා: ආමන්තා.
ස. පු: කෙනට්ඨෙනා’ති.
ප. වි: හන්ද හි මාරකායිකා දෙවතා අරහතො අසුචිං සුක්කවිසට්ඨිං උපසංහරන්තී’ති.
ස. පු: මාරකායිකා දෙවතා අරහතො අසුචිං සුක්කවිසට්ඨිං උපසංහරන්තී’ති.
ප. පටිඤ්ඤා: ආමන්තා.
ස. අනු: අත්ථී මාරකායිකානං දෙවතානං අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
ස. පු: නත්ථී මාරකායිකානං දෙවතානං අසුචි සුක්කවිසට්ඨී’ති.
ප. පටිඤ්ඤා: ආමන්තා.
අනු. ඨ: හඤ්චි නත්ථී මාරකායිකානං දෙවතානං අසුචි සුක්කවිසට්ඨි,
අනු. පා: නො ච වත රෙ වත්තබ්බෙ: ‘මාරකායිකා, දෙවතා අරහතො අසුචිං සුක්කවිසට්ඨිං උපසංහරන්තී’ති.
6. ස. පු: මාරකායිකා දෙවතා අරහතො අසුචිං සුක්කවිසට්ඨිං උපසංහරන්තී’ති.
ප. පටිඤ්ඤා: ආමන්තා.
ස. අනු: මාරකායිකා දෙවතා අත්තනො අසුචිං සුක්කවිසට්ඨිං උපසංහරන්ති, අඤ්ඤෙසං අසුචිං සුක්කවිසට්ඨිං උපසංහරන්ති, තස්ස අසුචිං සුක්කවිසට්ඨිං උපසංහරන්තී’ති.
ප. පටි: න හෙවං වත්තබ්බෙ -පෙ-
7. ස. පු: මාරකායිකා දෙවතා නෙව අත්තනො න අඤ්ඤෙසං න තස්ස අසුචිං සුක්කවිසට්ඨිං උපසංහරන්තී’ති.
ප. පටිඤ්ඤා: ආමන්තා.
අනු. ඨ: හඤ්චි මාරකායිකා දෙවතා නෙව අත්තනො න අඤ්ඤෙසං න තස්ස අසුචිං සුක්කවිසට්ඨිං උපසංහරන්ති,
අනු. පා: නො ච වත රෙ වත්තබ්බෙ: “මාරකායිකා දෙවතා අරහතො අසුචිං සුක්කවිසට්ඨිං උපසංහරන්තී”ති.