1. ස. පු: පරො පරස්ස සුඛං අනුප්පදෙතී’ති.

ප. පටිඤ්ඤා: ආමන්තා.

ස. පු: පරො පරස්ස දුක්ඛං අනුප්පදෙතී’ති.

ප. පටි: න හෙවං වත්තබ්බෙ -පෙ-

2. ස. පු: පරො පරස්ස දුක්ඛං අනුප්පදෙතීති.

ප. පටිඤ්ඤා: ආමන්තා.

ස. අනු: පරො පරස්ස සුඛං අනුප්පදෙතීති.

ප. පටි: න හෙවං වත්තබ්බෙ -පෙ-

3. ස. පු: පරො පරස්ස සුඛං අනුප්පදෙතීති.

ප. පටිඤ්ඤා: ආමන්තා.

ස. අනු: පරො පරස්ස අත්තනො සුඛං අනුප්පදෙති, අඤ්ඤෙසං සුඛං අනුප්පදෙති, තස්ස සුඛං අනුප්පදෙතීති.

ප. පටි: න හෙවං වත්තබ්බෙ -පෙ-

4. ස. පු: පරො පරස්ස නෙවත්තනො, න අඤ්ඤෙසං, න තස්ස සුඛං අනුප්පදෙතීති.

ප. පටිඤ්ඤා: ආමන්තා.

ස. ඨ: හඤ්චි පරො පරස්ස නෙවත්තනො, න අඤ්ඤෙසං, න තස්ස සුඛං අනුප්පදෙති,

ස. පා: නො ච වත රෙ වත්තබ්බෙ “පරො පරස්ස සුඛං අනුප්පදෙති”ති.

5. ස. පු: පරො පරස්ස සුඛං අනුප්පදෙතී’ති.

ප. පටිඤ්ඤා: ආමන්තා.

ස. අනු: අඤ්ඤො අඤ්ඤස්ස කාරකො, පරං කතං සුඛං දුක්ඛං, අඤ්ඤො කරොති, අඤ්ඤො පටිසංවෙදෙතී’ති.

ප. පටි: න හෙවං වත්තබ්බෙ -පෙ-

6. ප. පු: න වත්තබ්බං පරො පරස්ස සුඛං අනුප්පදෙතී’ති.

ස. පටිඤ්ඤා: ආමන්තා.

ප. අනු: නනු ආයස්මා උදායී එතදවොච:

“බහුන්නං වත නො භගවා දුක්ඛධම්මානං අපහත්තා, බහුන්නං වත නො භගවා සුඛධම්මානං උපහත්තා, බහුන්නං වත නො භගවා අකුසලානං ධම්මානං අපහත්තා, බහුන්නං වත නො භගවා කුසලානං ධම්මානං උපහත්තා”ති. අත්ථෙව සුත්තන්තො’ති.

ස. පටිඤ්ඤා: ආමන්තා.

ප. පා: තෙන හි “පරො පරස්ස සුඛං අනුප්පදෙතී”ති.