1. ස. පු: අවිජ්ජාපච්චයාපි සඞ්ඛාරා, න වත්තබ්බං ‘සඞ්ඛාරපච්චයාපි අවිජ්ජා’ති.

ප. පටිඤ්ඤා: ආමන්තා.

ස. අනු: නනු අවිජ්ජා සඞ්ඛාරෙන සහජාතා’ති.

ප. පටිඤ්ඤා: ආමන්තා.

ස. ඨ: හඤ්චි අවිජ්ජා සඞ්ඛාරෙන සහජාතා,

ස. පා: තෙන වත රෙ වත්තබ්බෙ “අවිජ්ජාපච්චයාපි සඞ්ඛාරා, සඞ්ඛාරපච්චයාපි අවිජ්ජා”ති.

2. ස. පු: තණ්හාපච්චයා උපාදානං, න වත්තබ්බං උපාදාන පච්චයාපි තණ්හා’ති.

ප. පටිඤ්ඤා: ආමන්තා.

ස. අනු: නනු තණ්හා උපාදානෙන සහජාතා’ති.

ප. පටිඤ්ඤා: ආමන්තා.

ස. ඨ: හඤ්චි තණ්හා උපාදානෙන සහජාතා,

ස. පා: තෙන වත රෙ වත්තබ්බෙ “තණ්හාපච්චයාපි උපාදානං, උපාදානපච්චයාපි තණ්හා”ති.

3. ප. පු: “ජරාමරණපච්චයා භික්ඛවෙ, ජාති, ජාතිපච්චයා භවො”ති අත්ථෙව සුත්තන්තො’ති.

ස. පටි: නත්ථි.

ප. නිග: තෙන හි “අවිජ්ජාපච්චයාපි සඞ්ඛාරා, න වත්තබ්බං, සඞ්ඛාරපච්චයාපි අවිජ්ජා’ති. තණ්හාපච්චයාපි උපාදානං, න වත්තබ්බං උපාදානපච්චයාපි තණ්හා”ති.

4. ස. පු: “විඤ්ඤාණපච්චයා භික්ඛවෙ නාමරූපං, නාමරූපපච්චයාපි විඤ්ඤාණ”න්ති අත්ථෙව සුත්තන්තො’ති.

ප. පටිඤ්ඤා: ආමන්තා.

ස. නිග: තෙන හි අවිජ්ජාපච්චයාපි සඞ්ඛාරා, සඞ්ඛාරපච්චයාපි අවිජ්ජා, තණ්හාපච්චයාපි උපාදානං උපාදානපච්චයාපි තණ්හා’ති.