12. 7.
එකබීජීකථා
1. ප. පු: න වත්තබ්බං “එකබීජී පුග්ගලො එකබීජිතානියතො’ති.
ස. පටිඤ්ඤා: ආමන්තා.
ප. අනු: නනු සො එකබීජී’ති.
ස. පටිඤ්ඤා: ආමන්තා.
අනු. ඨ: හඤ්චි සො එකබීජී,
අනු. පා: තෙන වත රෙ වත්තබ්බෙ “එකබීජී පුග්ගලො එකබීජිතානියතො’ති.
එකබීජිකථා නිට්ඨිතා.
12. 8.
ජීවිතාවොරොපනකථා.
1. ස. පු. දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්යා’ති.
ප. පටිඤ්ඤා: ආමන්තා.
ස. අනු: දිට්ඨිසම්පන්නො පුග්ගලො සඤ්චිච්ච මාතරං ජීවිතා වොරොපෙය්ය -පෙ- පිතරං ජීවිතා වොරොපෙය්ය -පෙ- අරහන්තං ජීවිතා වොරොපෙය්ය -පෙ- දුට්ඨෙන චිත්තෙන තථාගතස්ස ලොහිතං උප්පාදෙය්ය -පෙ- සඞ්ඝං භින්දෙය්යා’ති.
ප. පටි: න හෙවං වත්තබ්බෙ -පෙ-
2. ස. පු: දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්යා’ති.
ප. පටිඤ්ඤා: ආමන්තා.
ස. අනු: දිට්ඨිසම්පන්නො පුග්ගලො සත්ථරි අගාරවො’ති.
ප. පටි: න හෙවං වත්තබ්බෙ -පෙ-
ස. අනු: ධම්මෙ -පෙ- සඞ්ඝෙ -පෙ- සික්ඛාය අගාරවො’ති.
ප. පටි: න හෙවං වත්තබ්බෙ -පෙ-
ස. අනු: නනු දිට්ඨිසම්පන්නො පුග්ගලො සත්ථරි සගාරවො’ති.
ප. පටිඤ්ඤා: ආමන්තා.
අනු. ඨ: හඤ්චි දිට්ඨිසම්පන්නො පුග්ගලො සත්ථරි සගාරවො,
අනු. පා: නො ච වත රෙ වත්තබ්බෙ: දිට්ඨිසම්පන්නො පුග්ගලො සඤ්චිච්ච පාණං ජීවිතා වොරොපෙය්යා’ති.
ස. අනු: නනු දිට්ඨිසම්පන්නො පුග්ගලො ධම්මෙ -පෙ- සඞ්ඝෙ -පෙ- සික්ඛාය සගාරවො’ති.
ප. පටිඤ්ඤා: ආමන්තා.