1. ස. පු: ජහති පුථුජ්ජනො කාමරාගව්යාපාදන්ති.

ප. පටිඤ්ඤා: ආමන්තා.

ස. අනු: අච්චන්තං ජහති, අනවසෙසං ජහති, අප්පටිසන්ධියං ජහති, සමූලං ජහති, සතණ්හං ජහති, සානුසයං ජහති, අරියෙන ඤාණෙන ජහති, අරියෙන මග්ගෙන ජහති, අකුප්පං පටිවිජ්ඣන්තො ජහති, අනාගාමිඵලං සච්ඡිකරොන්තො ජහතී’ති.

ප. පටි: න හෙවං වත්තබ්බෙ -පෙ-

2. ස. පු: වික්ඛම්භෙති පුථුජ්ජනො කාමරාගව්යාපාදන්ති.

ප. පටි: ආමන්තා.

ස. අනු: අච්චන්තං වික්ඛම්භෙති, අනවසෙසං වික්ඛම්භෙති, අප්පටිසන්ධියං වික්ඛම්භෙති, සමූලං වික්ඛම්භෙති, සතණ්හං වික්ඛම්භෙති, සානුසයං වික්ඛම්භෙති, අරියෙන ඤාණෙන වික්ඛම්භෙති, අරියෙන මග්ගෙන වික්ඛම්භෙති, අකුප්පං පටිවිජ්ඣන්තො වික්ඛම්භෙති, අනාගාමිඵලං සච්ඡිකරොන්තො වික්ඛම්භෙතී’ති.

ප. පටි: න හෙවං වත්තබ්බෙ -පෙ-

3. ස. පු: ජහති අනාගාමිඵලසච්ඡිකිරියාය පටිපන්නො පුග්ගලො කාමරාගව්යාපාදං, සො ච අච්චන්තං ජහති, අනවසෙසං ජහති -පෙ- අනාගාමිඵලං සච්ඡිකරොන්තො ජහතී’ති.

ප. පටිඤ්ඤා: ආමන්තා.

ස. අනු: ජහති පුථුජ්ජනො කාමරාගව්යාපාදං, සො ච අච්චන්තං ජහති, අනවසෙසං ජහති -පෙ- අනාගාමිඵලං සච්ඡිකරොන්තො ජහතී’ති.

ප. පටි: න හෙවං වත්තබ්බෙ -පෙ-

4. ස. පු: වික්ඛම්භෙති අනාගාමිඵලසච්ඡිකිරියාය පටිපන්නො පුග්ගලො කාමරාගව්යාපාදං, සො ච අච්චන්තං වික්ඛම්භෙති අනවසෙසං වික්ඛම්භෙති -පෙ- අනාගාමිඵලං සච්ඡිකරොන්තො වික්ඛම්භෙති’ති.

ප. පටිඤ්ඤා: ආමන්තා.

ස. අනු: වික්ඛම්භෙති පුථුජ්ජනො කාමරාගව්යාපාදං, සො ච අච්චන්තං වික්ඛම්භෙති, අනවසෙසං වික්ඛම්භෙති -පෙ- අනාගාමිඵලං සච්ඡිකරොන්තො වික්ඛම්භෙතී’ති.

ප. පටි: න හෙවං වත්තබ්බෙ -පෙ-

5. ස. පු: ජහති පුථුජ්ජනො කාමරාගව්යාපාදං, සො ච න අච්චන්තං ජහති, න අනවසෙසං ජහති -පෙ- න අනාගාමිඵලං සච්ඡිකරොන්තො ජහතී’ති.

ප. පටිඤ්ඤා: ආමන්තා.

ස. අනු: ජහති අනාගාමිඵලසච්ඡිකිරියාය පටිපන්නො පුග්ගලො කාමරාගව්යාපාදං, සො ච න අච්චන්තං ජහති -පෙ- න අනාගාමිඵලං සච්ඡිකරොන්තො ජහතී’ති.

ප. පටි: න හෙවං වත්තබ්බෙ -පෙ-

6. ස. පු: වික්ඛම්භෙති පුථුජ්ජනො කාමරාගව්යාපාදං, සො ච න අච්චන්තං වික්ඛම්භෙති, න අනවසෙසං වික්ඛම්භෙති -පෙ- න අනාගාමිඵලං සච්ඡිකරොන්තො වික්ඛම්භෙතී’ති.

ප. පටිඤ්ඤා: ආමන්තා.

ස. අනු: වික්ඛම්භෙති අනාගාමිඵලසච්ඡිකිරියාය පටිපන්නො පුග්ගලො කාමරාගව්යාපාදං, සො ච න අච්චන්තං වික්ඛම්භෙති න අනවසෙසං වික්ඛම්භෙති -පෙ- න අනාගාමිඵලං සච්ඡිකරොන්තො වික්ඛම්භෙතී’ති.

ප. පටි: න හෙවං වත්තබ්බෙ -පෙ-