1514. කතමෙ ධම්මා පරාමාසා:

දිට්ඨිපරාමාසො චතුසු දිට්ඨිගතසම්පයුත්තෙසු චිත්තුප්පාදෙසු උප්පජ්ජති, ඉමෙ ධම්මා පරාමාසා.

1515. කතමෙ ධම්මා නො පරාමාසා:

ඨපෙත්වා පරාමාසං අවසෙසං අකුසලං, චතුසු භූමීසු කුසලං, චතුසු භූමිසු විපාකො, තීසු භූමීසු කිරියාව්යාකතං, රූපං ච නිබ්බානං ච, ඉමෙ ධම්මා නො පරාමාසා.

1516. කතමෙ ධම්මා පරාමට්ඨා:

තීසු භූමිසු කුසලං, අකුසලං, තීසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා පරාමට්ඨා.

1517. කතමෙ ධම්මා අපරාමට්ඨා:

චත්තාරො මග්ගා අපරියාපන්නා, චත්තාරි ච සාමඤ්ඤඵලානි, නිබ්බානං ච, ඉමෙ ධම්මා අපරාමට්ඨා.

1518. කතමෙ ධම්මා පරාමාසසම්පයුත්තා:

චත්තාරො දිට්ඨිගතසම්පයුත්තචිත්තුප්පාදා, එත්ථුප්පන්නං පරාමාසං ඨපෙත්වා, ඉමෙ ධම්මා පරාමාසසම්පයුත්තා.

1519. කතමෙ ධම්මා පරාමාසවිප්පයුත්තා:

චත්තාරො දිට්ඨිගතවිප්පයුත්තලොභසහගතචිත්තුප්පාදා, ද්වෙ දොමනස්සසහගතචිත්තුප්පාදා, විචිකිච්ඡාසහගතො චිත්තුප්පාදො, උද්ධච්චසහගතො චිත්තුප්පාදො, චතුසු භූමිසු කුසලං, චතුසු භූමිසු විපාකො, තීසු භූමිසු කිරියාව්යාකතං, රූපං ච, නිබ්බානං ච, ඉමෙ ධම්මා පරාමාසවිප්පයුත්තා.

පරාමාසො න වත්තබ්බො පරාමාසසම්පයුත්තොතිපි පරාමාසවිප්පයුත්තොතිපි.

1520. කතමෙ ධම්මා පරාමාසා චෙව පරාමට්ඨා ච:

සො එව පරාමාසො පරාමාසො චෙව පරාමට්ඨො ච.

1521. කතමෙ ධම්මා පරාමට්ඨා චෙව නො ච පරාමාසා:

ඨපෙත්වා පරාමාසං අවසෙසං අකුසලං, තීසු භූමිසු කුසලං, තීසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා පරාමට්ඨා චෙව නො ච පරාමාසා.

අපරාමට්ඨා ධම්මා න වත්තබ්බා පරාමාසා චෙව පරාමට්ඨාතිපි, පරාමට්ඨා චෙව නො ච පරාමාසාතිපි.

1522. කතමෙ ධම්මා පරාමාසවිප්පයුත්තා පරාමට්ඨා:

චත්තාරො දිට්ඨිගතවිප්පයුත්තලොභසහගතචිත්තුප්පාදා, ද්වෙ දොමනස්සසහගතචිත්තුප්පාදා, විචිකිච්ඡාසහගතො චිත්තුප්පාදො, උද්ධච්චසහගතො චිත්තුප්පාදො, තීසු භූමිසු කුසලං, තීසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා පරාමාසවිප්පයුත්තා පරාමට්ඨා.

1523. කතමෙ ධම්මා පරාමාසවිප්පයුත්තා අපරාමට්ඨා:

චත්තාරො මග්ගා අපරියාපන්නා, චත්තාරි ච සාමඤ්ඤඵලානි, නිබ්බානං ච, ඉමෙ ධම්මා පරාමාසවිප්පයුත්තා අපරාමට්ඨා.

පරාමාසා ච පරාමාසසම්පයුත්තා ච ධම්මා න වත්තබ්බා පරාමාසවිප්පයුත්තා පරාමට්ඨාතිපි, පරාමාසවිප්පයුත්තා අපරාමට්ඨාතිපි.

1524. කතමෙ ධම්මා සාරම්මණා.

චතුසු භූමීසු කුසලං, අකුසලං, චතුසු භූමීසු විපාකො, තීසු භූමිසු කිරියාව්යාකතං, ඉමෙ ධම්මා සාරම්මණා.

1525. කතමෙ ධම්මා අනාරම්මණා:

රූපං ච නිබ්බානං ච, ඉමෙ ධම්මා අනාරම්මණා.

1526. කතමෙ ධම්මා චිත්තා:

චක්ඛුවිඤ්ඤාණං සොතවිඤ්ඤාණං ඝානවිඤ්ඤාණං ජිව්හාවිඤ්ඤාණං කායවිඤ්ඤාණං මනොධාතු මනොවිඤ්ඤාණධාතු, ඉමෙ ධම්මා චිත්තා.

1527. කතමෙ ධම්මා නො චිත්තා:

වෙදනාක්ඛන්ධො, සඤ්ඤාක්ඛන්ධො, සඞ්ඛාරක්ඛන්ධො, රූපං ච, නිබ්බානං ච, ඉමෙ ධම්මා නො චිත්තා.

1528. කතමෙ ධම්මා චෙතසිකා:

වෙදනාක්ඛන්ධො, සඤ්ඤාක්ඛන්ධො, සඞ්ඛාරක්ඛන්ධො, ඉමෙ ධම්මා චෙතසිකා.

1529. කතමෙ ධම්මා අචෙතසිකා:

චිත්තං ච රූපං ච නිබ්බානං ච, ඉමෙ ධම්මා අචෙතසිකා.

1530. කතමෙ ධම්මා චිත්තසම්පයුත්තා:

වෙදනාක්ඛන්ධො සඤ්ඤාක්ඛන්ධො සඞ්ඛාරක්ඛන්ධො, ඉමෙ ධම්මා චිත්තසම්පයුත්තා.

1531. කතමෙ ධම්මා චිත්තවිප්පයුත්තා:

රූපං ච, නිබ්බානං ච, ඉමෙ ධම්මා චිත්තවිප්පයුත්තා.

චිත්තං න වත්තබ්බං චිත්තෙන සම්පයුත්තන්තිපි, චිත්තෙන විප්පයුත්තන්තිපි.