886. කතමං තං රූපං උපාදා උපාදින්නං?

චක්ඛායතනං -පෙ- කායායතනං ඉත්ථින්ද්රියං පුරිසින්ද්රියං ජීවිතින්ද්රියං, යං වා පනඤ්ඤම්පි අත්ථි රූපං කම්මස්ස කතත්තා රූපායතනං ගන්ධායතනං රසායතනං ආකාසධාතු රූපස්ස උපචයො රූපස්ස සන්තති කබලිංකාරො ආහාරො, ඉදං තං රූපං උපාදා උපාදින්නං.

887. කතමං තං රූපං උපාදා අනුපාදින්නං?

සද්දායතනං කායවිඤ්ඤත්ති වචීවිඤ්ඤත්ති රූපස්ස ලහුතා රූපස්ස කම්මඤ්ඤතා රූපස්ස ජරතා රූපස්ස අනිච්චතා, යං වා පනඤ්ඤම්පි අත්ථි රූපං න කම්මස්ස කතත්තා රූපායතනං ගන්ධායතනං රසායතනං ආකාසධාතු රූපස්ස උපචයො රූපස්ස සන්තති කබලිංකාරො ආහාරො, ඉදං තං රූපං උපාදා අනුපාදින්නං.

888. කතමං තං රූපං නො උපාදාඋපාදින්නං?

කම්මස්ස කතත්තා ඵොට්ඨබ්බායතනං ආපොධාතු. ඉදං තං රූපං නො උපාදාඋපාදින්නං.

889. කතමං තං රූපං නො උපාදාඅනුපාදින්නං?

න කම්මස්ස කතත්තා ඵොට්ඨබ්බායතනං, ආපොධාතු. ඉදං තං රූපං නො උපාදාඅනුපාදින්නං.

890. කතමං තං රූපං උපාදාඋපාදින්නුපාදානියං?

චක්ඛායතනං -පෙ- කායායතනං ඉත්ථින්ද්රියං පුරිසින්ද්රියං ජීවිතින්ද්රියං, යං වා පනඤ්ඤම්පි අත්ථි රූපං කම්මස්ස කතත්තා රූපායතනං ගන්ධායතනං ආකාසධාතු රූපස්ස උපචයො රූපස්ස සන්තති කබලිංකාරො ආහාරො. ඉදං තං රූපං උපාදාඋපාදින්නුපාදානියං.

891. කතමං තං රූපං උපාදාඅනුපාදින්නුපාදානියං?

සද්දායතනං කායවිඤ්ඤත්ති වචීවිඤ්ඤත්ති රූපස්ස ලහුතා රූපස්ස මුදුතා රූපස්ස කම්මඤ්ඤතා රූපස්ස ජරතා රූපස්ස අනිච්චතා, යං වා පනඤ්ඤම්පි අත්ථි රූපං න කම්මස්ස කතත්තා රූපායතනං ගන්ධායතනං රසායතනං ආකාසධාතු රූපස්ස උපචයො රූපස්ස සන්තති කබලිංකාරො ආහාරො. ඉදං තං රූපං උපාදාඅනුපාදින්නුපාදානියං.

892. කතමං තං රූපං නො උපාදාඋපාදින්නුපාදානියං?

කම්මස්ස කතත්තා ඵොට්ඨබ්බායතනං ආපොධාතු. ඉදං තං රූපං නො උපාදාඋපාදින්නුපාදානියං.

893. කතමං තං රූපං නො උපාදාඅනුපාදින්නුපාදානියං?

න කම්මස්ස කතත්තා ඵොට්ඨබ්බායතනං ආපොධාතු. ඉදං තං රූපං නො උපාදාඅනුපාදින්නුපාදානියං.

894. කතමං තං රූපං උපාදාසප්පටිඝං?

චක්ඛායතනං -පෙ- රසායතනං. ඉදං තං රූපං උපාදාසප්පටිඝං.

895. කතමං තං රූපං උපාදාඅප්පටිඝං?

ඉත්ථින්ද්රියං -පෙ- කබලිංකාරො ආහාරො. ඉදං තං රූපං උපාදා අප්පටිඝං.

896. කතමං තං රූපං නො උපාදාසප්පටිඝං.

ඵොට්ඨබ්බායතනං. ඉදං තං රූපං නො උපාදාසප්පටිඝං.

897. කතමං තං රූපං නො උපාදාඅප්පටිඝං?

ආපොධාතු. ඉදං තං රූපං නො උපාදාඅප්පටිඝං.