සෙය්යථාපි භික්ඛවෙ, ගණ්ඩො අනෙකවස්සගණිකො තස්සස්සු නව වණමුඛානි නව අභෙදනමුඛානි, තතො යං කිඤ්චි පග්ඝරෙය්ය අසුචිඤ්ඤෙව පග්ඝරෙය්ය, දුග්ගන්ධඤ්චෙව පග්ඝරෙය්ය, ජෙගුච්ඡියඤ්ඤෙව පග්ඝරෙය්ය. යං කිඤ්චි පසවෙය්ය අසුචිඤ්ඤෙව පසවෙය්ය, දුග්ගන්ධඤ්ඤෙව පසවෙය්ය, ජෙගුච්ඡියඤ්ඤෙව පසවෙය්ය.

’ගණ්ඩො’ති ඛො භික්ඛවෙ, ඉමස්සෙව චාතුම්මහාභූතිකස්ස කායස්ස අධිවචනං මාතාපෙත්තිකසම්භවස්ස ඔදනකුම්මාසූපචයස්ස අනිච්චුච්ඡාදනපරිමද්දන භෙදන විද්ධංසනධම්මස්ස. තස්ස නව වණමුඛානි, නව අභෙදනමුඛානි, තතො යං කිඤ්චි පග්ඝරති අසුචිඤ්ඤෙව පග්ඝරති, දුග්ගන්ධඤ්ඤෙව පග්ඝරති, ජෙගුච්ඡියඤ්ඤෙව පග්ඝරති. යං කිඤ්චි පසවති අසුචිඤ්ඤෙව පසවති, දුග්ගන්ධඤ්ඤෙව පසවති, ජෙගුච්ඡියඤ්ඤෙව පසවති. තස්මාතිහ භික්ඛවෙ ඉමස්මිං කායෙ නිබ්බින්දථාති.

නව ඉමා භික්ඛවෙ, සඤ්ඤා භාවිතා බහුලීකතා මහප්ඵලා හොන්ති මහානිංසා අමතොගධා අමතපරියොසානා. කතමා නව?

අසුභසඤ්ඤා, මරණසඤ්ඤා, ආහාරෙ පටික්කූලසඤ්ඤා, සබ්බලොකෙ අනභිරතසඤ්ඤා, අනිච්චසඤ්ඤා, අනිච්චෙ දුක්ඛසඤ්ඤා, දුක්ඛෙ අනත්තසඤ්ඤා, පහානසඤ්ඤා, විරාග සඤ්ඤා. ඉමා ඛො භික්ඛවෙ, නව සඤ්ඤා භාවිතා බහුලීකතා මහප්ඵලා හොන්ති මහානිසංසා අමතොගධා අමතපරියොසානාති.

නවහි භික්ඛවෙ, අඞ්ගෙහි සමන්නාගතං කුලං අනුපගන්ත්වා වා නාලං උපගන්තුං, උපගන්ත්වා වා නාලං උපනිසීදිතුං කතමෙහි නවහි:

න මනාපෙන පච්චුට්ඨෙන්ති, න මනාපෙන අභිවාදෙන්ති, න මනාපෙන ආසනං දෙන්ති, සන්තමස්ස පරිගූහන්ති, බහුකම්පි ථොකං දෙන්ති, පණීතම්පි ලූඛං දෙන්ති, අසක්කච්චං දෙන්ති නො සක්කච්චං, න උපනිසීදන්ති ධම්මසවණාය, භාසිතස්ස න රසීයන්ති. ඉමෙහි ඛො භික්ඛවෙ, නවහඞ්ගෙහි සමන්නාගතං කුලං අනුපගන්ත්වා වා නාලං උපගන්තුං, උපගන්ත්වා වා නාලං උපනිසීදිතුං.