එවං මෙ සුතං: එකං සමයං භගවා චාලිකායං විහරති චාලිකාය පබ්බතෙ. තෙන ඛො පන සමයෙන ආයස්මා මෙඝියො භගවතො උපට්ඨාකො හොති, අථ ඛො ආයස්මා මෙඝියො යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො ආයස්මා මෙඝියො භගවන්තං එතදවොච: ඉච්ඡාමහං භන්තෙ, ජන්තුගාමං පිණ්ඩාය පවිසිතුන්ති. යස්සදානි ත්වං මෙඝිය කාලං මඤ්ඤසීති.

අථ ඛො ආයස්මා මෙඝියො පුබ්බන්හසමයං නිවාසෙත්වා පත්තචීවරමාදාය ජන්තුගාමං පිණ්ඩාය පාවිසි: ජන්තුගාමෙ පිණ්ඩාය චරිත්වා පච්ඡාභත්තං පිණ්ඩපාතපටික්කන්තො යෙන කිමිකාලාය නදියා තීරං තෙනුපසඞ්කමි. අද්දසා ඛො ආයස්මා මෙඝියො කිමිකාලාය නදියා තීරෙ ජඞ්ඝාවිහාරං අනුචඞ්කමමානො අනුවිචරමානො අම්බවනං පාසාදිකං රමණීයං. දිස්වානස්ස එතදහොසි: පාසාදිකං වතිදං අම්බවනං රමණීයං, අලං වතිදං කුලපුත්තස්ස පධානත්ථිකස්ස පධානාය. සචෙ මං භගවා අනුජානෙය්ය, ආගච්ඡෙය්යාහං ඉමං අම්බවනං පධානායාති.

අථ ඛො ආයස්මා මෙඝියො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා මෙඝියො භගවන්තං එතදවොච: ඉධාහං භන්තෙ පුබ්බන්හසමයං නිවාසෙත්වා පත්තචීවරමාදාය ජන්තුගාමං පිණ්ඩාය පාවිසිං. ජන්තුගාමෙ පිණ්ඩාය චරිත්වා පච්ඡාභත්තං පිණ්ඩපාතපටික්කන්තො යෙන කිමිකාලාය නදියා තීරං තෙනුපසඞ්කමිං.

අද්දසං ඛො අහං භන්තෙ, කිමිකාලාය නදියා තීරෙ ජඞ්ඝාවිහාරං අනුචඞ්කමමානො අනුවිචරමානො අම්බවනං පාසාදිකං රමණීයං, දිස්වාන මෙ එතදහොසි: පාසාදිකං වතිදං අම්බවනං රමණීයං, අලං වතිදං කුලපුත්තස්ස පධානත්ථිකස්ස පධානාය. සචෙ මං භගවා අනුජානෙය්ය ආගච්ඡෙය්යාහං ඉමං අම්බවනං පධානායාති. සචෙ මං භගවා අනුජානෙය්ය ගච්ඡෙය්යාහං තං අම්බවනං පධානායාති.

ආගමෙහි තාව මෙඝිය, එකකම්හා තාව යාව අඤ්ඤාපි කොචි භික්ඛු ආගච්ඡතීති.

දුතියම්පි ඛො ආයස්මා මෙඝියො භගවන්තං එතදවොච: භගවතො භන්තෙ, නත්ථි කිඤ්චි උත්තරිං කරණීයං, නත්ථි කතස්ස පතිචයො. මය්හං ඛො පන භන්තෙ, අත්ථි උත්තරිං කරණීයං, අත්ථි කතස්ස පතිචයො. සචෙ මං භගවා අනුජානෙය්ය, ගච්ඡෙය්යාහං තං අම්බවනං පධානායාති.

ආගමෙහි තාව මෙඝිය, එකකම්හා තාව යාව අඤ්ඤොපි කොචි භික්ඛු ආගච්ඡතීති.

තතියම්පි ඛො ආයස්මා මෙඝියො භගවන්තං එතදවොච: භගවතො භන්තෙ, නත්ථි කිඤ්චි උත්තරිං කරණීයං, නත්ථි කතස්ස වා පතිචයො. මය්හං ඛො පන භන්තෙ, අත්ථි උත්තරිං කරණීයං, අත්ථි කතස්ස පතිචයො. සචෙ මං භගවා අනුජානෙය්ය, ගච්ඡෙය්යාහං තං අම්බවනං පධානායාති.

පධානන්ති ඛො මෙඝිය වදමානං කින්ති වදෙය්යාම, යස්සදානි ත්වං මෙඝිය කාලං මඤ්ඤසීති.

අථ ඛො ආයස්මා මෙඝියො උට්ඨායාසනා භගවන්තං අභිවාදෙත්වා පදක්ඛිණං කත්වා යෙන තං අම්බවනං තෙනුපසඞ්කමි. උපසඞ්කමිත්වා තං අම්බවනං අජ්ඣොගාහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි. අථ ඛො ආයස්මතො මෙඝියස්ස තස්මිං අම්බවනෙ විහරන්තස්ස යෙභුය්යෙන තයො පාපකා අකුසලා විතක්කා සමුදාචරන්ති. සෙය්යථීදං: කාමවිතක්කො ව්යාපාදවිතක්කො විහිංසාවිතක්කො. අථ ඛො ආයස්මතො මෙඝියස්ස එතදහොසි: අච්ඡරියං වත භො, අබ්භුතං වත භො, සද්ධාය වත චම්හි අගාරස්මා අනගාරියං පබ්බජිතො. අථ ච පන ඉමෙහි තීහි පාපකෙහි අකුසලෙහි විතක්කෙහි අන්වාසත්තො කාමවිතක්කෙන ව්යාපාදවිතක්කෙන විහිංසාවිතක්කෙනාති.