කුලපුත්තො’ ති භික්ඛවෙ, නන්දං සම්මාවදමානො වදෙය්ය; බලවාති භික්ඛවෙ, නන්දං සම්මා වදමානො වදෙය්ය; පාසාදිකොති භික්ඛවෙ, නන්දං සම්මා වදමානො වදෙය්ය; තිබ්බරාගොති භික්ඛවෙ, නන්දං සම්මාවදමානො වදෙය්ය.

කිමඤ්ඤත්ර භික්ඛවෙ, නන්දො ඉන්ද්රියෙසු ගුත්තද්වාරො භොජනෙසු මත්තඤ්ඤූ ජාගරියං අනුයුත්තො සතිසම්පජඤ්ඤෙන සමන්නාගතො. යෙහි නන්දො සක්කොති පරිපුණ්ණං පරිසුද්ධං බ්රහ්මචරියං චරිතුං:

තත්රීදං භික්ඛවෙ, නන්දස්ස ඉන්ද්රියෙසු ගුත්තද්වාරතාය හොති: සචෙ භික්ඛවෙ, නන්දස්ස පුරත්ථිමා දිසා ආලොකෙතබ්බා හොති, සබ්බං චෙතසා සමන්නාහරිත්වා නන්දො පුරත්ථිමං දිසං ආලොකෙති, ‘එවං මෙ පුරත්ථිමං දිසං ආලොකයතො න අභිජ්ඣා දොමනස්සා පාපකා අකුසලා ධම්මා අන්වාස්සවිස්සන්තී’ති, ඉතිහ තත්ථ සම්පජානො හොති. සචෙ භික්ඛවෙ, නන්දස්ස පච්ඡිමා දිසා ආලොකෙතබ්බා හොති -පෙ- උත්තරා දිසා ආලොකෙතබ්බා හොති -පෙ- දක්ඛිණා දිසා ආලොකෙතබ්බා හොති -පෙ- උද්ධං උල්ලොකෙතබ්බා හොති -පෙ- අධො ඔලොකෙතබ්බා හොති -පෙ- අනුදිසා අනුවිලොකෙතබ්බා හොති, සබ්බං චෙතසා සමන්නාහරිත්වා නන්දො අනුදිසං අනුවිලොකෙති. ‘එවම්මෙ අනුදිසං අනුවිලොකයතො නාභිජ්ඣාදොමනස්සා පාපකා අකුසලා ධම්මා අන්වාස්සවිස්සන්තීති. ඉතිහ තත්ථ සම්පජානො, ඉදං ඛො භික්ඛවෙ, නන්දස්ස ඉන්ද්රියෙසු ගුත්තද්වාරතාය හොති.

තත්රිදං භික්ඛවෙ, නන්දස්ස භොජනෙ මත්තඤ්ඤුතාය හොති: ඉධ භික්ඛවෙ නන්දො පටිසඞ්ඛායොනිසො ආහාරං ආහාරෙති: නෙව දවාය න මදාය න මණ්ඩනාය න විභූසනාය, යාවදෙව ඉමස්ස කායස්ස ඨිතියා යාපනාය විහිංසූපරතියා බ්රහ්මචරියානුග්ගහාය, ඉති පුරාණඤ්ච වෙදනං පටිහඞ්ඛාමි, නවඤ්ච වෙදනං න උප්පාදෙස්සාමි, යාත්රා ච මෙ භවිස්සති, අනවජ්ජතා ච ඵාසුවිහාරො චාති. ඉදං ඛො භික්ඛවෙ, නන්දස්ස භොජනෙ මත්තඤ්ඤුතාය හොති.

තත්රිදං භික්ඛවෙ, නන්දස්ස ජාගරියානුයොගස්මිං හොති. ඉධ භික්ඛවෙ, නන්දො දිවසං චඞ්කමෙන නිසජ්ජාය ආවරණීයෙහි ධම්මෙහි චිත්තං පරිසොධෙති. රත්තියා පඨමං යාමං චඞ්කමෙන නිසජ්ජාය ආවරණීයෙහි ධම්මෙහි චිත්තං පරිසොධෙති. රත්තියා මජ්ඣිමං යාමං දක්ඛිණෙන පස්සෙන සීහසෙය්යං කප්පෙති. පාදෙ පාදං අච්චාධාය සතො සම්පජානො උට්ඨානසඤ්ඤං මනසිකරිත්වා. රත්තියා පච්ඡිමං යාමං පච්චුට්ඨාය චඞ්කමෙන නිසජ්ජාය ආවරණීයෙහි ධම්මෙහි චිත්තං පරිසොධෙති. ඉදං ඛො භික්ඛවෙ, නන්දස්ස ජාගරියානුයොගස්මිං හොති.

තත්රිදං භික්ඛවෙ, නන්දස්ස සතිසම්පජඤ්ඤස්මිං හොති: ඉධ භික්ඛවෙ, නන්දස්ස විදිතා වෙදනා උප්පජ්ජන්ති, විදිතා උපට්ඨහන්ති, විදිතා අබ්භත්ථං ගච්ඡන්ති, විදිතා සඤ්ඤා උප්පජ්ජන්ති -පෙ- විදිතා විතක්කා උප්පජ්ජන්ති, විදිතා උපට්ඨාහන්ති, විදිතා අබ්භත්ථං ගච්ඡන්ති. ඉදං ඛො භික්ඛවෙ, නන්දස්ස සතිසම්පජඤ්ඤස්මිං හොති.

කිමඤ්ඤත්ර භික්ඛවෙ, නන්දො ඉන්ද්රියෙසු ගුත්තද්වාරො භොජනෙ මත්තඤ්ඤූ ජාගරියං අනුයුත්තො සතිසම්පජඤ්ඤෙන සමන්නාගතො යෙහි නන්දො සක්කොති පරිපුණ්ණං පරිසුද්ධං බ්රහ්මචරියං චරිතුන්ති.

එකං සමයං භගවා චම්පායං විහරති ගග්ගරාය පොක්ඛරණියා තීරෙ. තෙන ඛො පන සමයෙන භික්ඛු භික්ඛුං ආපත්තියා චොදෙන්ති. සො භික්ඛු භික්ඛූහි ආපත්තියා චොදියමානො අඤ්ඤෙනඤ්ඤං පටිචරති, බහිද්ධා කථං අපනාමෙති, කොපඤ්ච දොසඤ්ච අප්පච්චයඤ්ච පාතුකරොති. අථ ඛො භගවා භික්ඛු ආමන්තෙසි. නිද්ධමථෙතං භික්ඛවෙ පුග්ගලං, නිද්ධමථෙතං භික්ඛවෙ, පුග්ගලං, අපනෙය්යෙසො භික්ඛවෙ පුග්ගලො. කිං වො පරපුත්තො විහෙඨීයති.

ඉධ භික්ඛවෙ, එකච්චස්ස පුග්ගලස්ස තාදිසං යෙව හොති. අභික්කන්තං පටික්කන්තං ආලොකිතං විලොකිතං සම්මිඤ්ජිතං පසාරිතං සංඝාටිපත්ත චීවරධාරණං. සෙය්යථාපි අඤ්ඤෙසං භද්දකානං භික්ඛූනං යාවස්ස භික්ඛු ආපත්තිං න පස්සන්ති, යතො ච ඛ්වාස්ස භික්ඛු ආපත්තිං පස්සන්ති තමෙනං එවං ජානන්ති. සමණදූසී චායං සමණපලාපො සමණකාරණ්ඩවොති. තමෙනං ඉති විදිත්වා බහිද්ධා නාසෙන්ති. තං කිස්ස හෙතු: මා අඤ්ඤෙ භද්දකෙ භික්ඛු දූසෙසීති.