32. සත්තන්නං භික්ඛවෙ ධම්මානං භින්නත්තා භික්ඛු හොති. කතමෙසං සත්තන්නං:

සක්කායදිට්ඨි භින්නා හොති, විචිකිච්ඡා භින්නා හොති, සීලබ්බතපරාමාසො භින්නො හොති, රාගො භින්නො හොති, දොසො භින්නො හොති, මොහො භින්නො හොති, මානො භින්නො හොති.

ඉමෙසං ඛො භික්ඛවෙ සත්තන්නං ධම්මානං භින්නත්තා භික්ඛු හොතීති.

33. (සත්තන්නං භික්ඛවෙ ධම්මානං) සමිතත්තා සමණො හොති. -පෙ-

34. (සත්තන්නං භික්ඛවෙ ධම්මානං) බාහිතත්තා බ්රාහ්මණො හොති. -පෙ-

35. (සත්තන්නං භික්ඛවෙ ධම්මානං) නිස්සුතත්තා සොත්ථියො හොති -පෙ-

36. (සත්තන්නං භික්ඛවෙ ධම්මානං) නහාතත්තා නහාතකො හොති -පෙ-

37. (සත්තන්නං භික්ඛවෙ ධම්මානං) විදිතත්තා වෙදගූ හොති -පෙ-

38. (සත්තන්නං භික්ඛවෙ ධම්මානං) අරහත්තා අරියො හොති -පෙ-

39. (සත්තන්නං භික්ඛවෙ ධම්මානං) ආරකත්තා අරහා හොති. කතමෙසං සත්තන්නං:

සක්කායදිට්ඨි ආරකා හොති, විචිකිච්ඡා ආරකා හොති, සීලබ්බතපරාමාසො ආරකො හොති, රාගො ආරකො හොති, දොසො ආරකො හොති, මොහො ආරකො හොති, මානො ආරකො හොති.

ඉමෙසං ඛො භික්ඛවෙ සත්තන්නං ධම්මානං ආරකත්තා අරහා හොතීති.

40. සත්තිමෙ භික්ඛවෙ, අසද්ධම්මා. කතමෙ සත්ත:

අස්සද්ධො හොති, අහිරිකො හොති, අනොත්තාපී හොති, අප්පස්සුතො හොති, කුසීතො හොති, මුට්ඨස්සති හොති, දුප්පඤ්ඤො හොති.

ඉමෙ ඛො භික්ඛවෙ, සත්ත අසද්ධම්මා.

41. සත්තිමෙ භික්ඛවෙ, සද්ධම්මා. කතමෙ සත්ත:

සද්ධො හොති, හිරිමා හොති, ඔත්තප්පී හොති, බහුස්සුතො හොති, ආරද්ධවිරියො හොති, සතිමා හොති, පඤ්ඤවා හොති.

ඉමෙ ඛො භික්ඛවෙ, සත්ත සද්ධම්මා.