7. 1. 1. 4.
[විත්ථතසත්තබල සුත්තං]
[සාවත්ථිනිදානං]
4. සත්තිමානි භික්ඛවෙ, බලානි. කතමානි සත්ත:
සද්ධාබලං, විරියබලං, හිරිබලං, ඔත්තප්පබලං, සතිබලං, සමාධිබලං, පඤ්ඤාබලං.
(1) කතමඤ්ච භික්ඛවෙ, සද්ධාබලං:
ඉධ භික්ඛවෙ අරියසාවකො සද්ධො හොති සද්දහති තථාගතස්ස බොධිං: “ඉතිපි සො භගවා අරහං සම්මාසම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථි සත්ථා දෙවමනුස්සානං බුද්ධො භගවා”ති. ඉදං වුච්චති භික්ඛවෙ සද්ධාබලං.
(2) කතමඤ්ච භික්ඛවෙ, විරියබලං:
ඉධ භික්ඛවෙ, අරියසාවකො ආරද්ධවිරියො විහරති: අකුසලානං ධම්මානං පහානාය, කුසලානං ධම්මානං උපසම්පදාය, ථාමවා දළ්හපරක්කමො අනික්ඛිත්තධුරො කුසලෙසු ධම්මෙසු. ඉදං වුච්චති භික්ඛවෙ, විරියබලං.
(3) කතමඤ්ච භික්ඛවෙ, හිරිබලං:
ඉධ භික්ඛවෙ, අරියසාවකො හිරිමා හොති, හිරීයති කායදුච්චරිතෙන, වචීදුච්චරිතෙන, මනොදුච්චරිතෙන, හිරීයති පාපකානං අකුසලානං ධම්මානං සමාපත්තියා. ඉදං වුච්චති භික්ඛවෙ, හිරිබලං.
(4) කතමඤ්ච භික්ඛවෙ, ඔත්තප්පබලං:
ඉධ භික්ඛවෙ, අරියසාවකො ඔත්තප්පී හොති, ඔත්තපති කායදුච්චරිතෙන, වචීදුච්චරිතෙන, මනොදුච්චරිතෙන, ඔත්තපති පාපකානං අකුසලානං ධම්මානං සමාපත්තියා. ඉදං වුච්චති භික්ඛවෙ, ඔත්තප්පබලං.
(5) කතමඤ්ච භික්ඛවෙ, සතිබලං:
ඉධ භික්ඛවෙ, අරියසාවකො සතිමා හොති පරමෙන සතිනෙපක්කෙන සමන්නාගතො චිරකතම්පි චිරභාසිතම්පි සරිතා අනුස්සරිතා. ඉදං වුච්චති භික්ඛවෙ, සතිබලං.
(6) කතමඤ්ච භික්ඛවෙ, සමාධිබලං:
ඉධ භික්ඛවෙ, අරියසාවකො විවිච්චෙව කාමෙහි -පෙ- චතුත්ථංඣානං උපසම්පජ්ජ විහරති. ඉදං වුච්චති භික්ඛවෙ, සමාධිබලං.
(7) කතමඤ්ච භික්ඛවෙ, පඤ්ඤාබලං:
ඉධ භික්ඛවෙ අරියසාවකො පඤ්ඤවා හොති උදයත්ථගාමිනියා පඤ්ඤාය සමන්නාගතො අරියාය නිබ්බෙධිකාය සම්මා දුක්ඛක්ඛයගාමිනියා. ඉදං වුච්චති භික්ඛවෙ, පඤ්ඤාබලං.
ඉමානි ඛො භික්ඛවෙ, සත්තබලානි.
3. සද්ධාබලං විරියබලං හිරිඔත්තප්පියං බලං
සතිබලං සමාධී ච පඤ්ඤා වෙ සත්තමං බලං.
එතෙහි බලවා භික්ඛු සුඛං ජීවති පණ්ඩිතො.
4. යොනිසො විචිනෙ ධම්මං පඤ්ඤායත්ථං විපස්සති
පජ්ජොතස්සෙව නිබ්බානං විමොඛො හොති චෙතසො’ති.
7. 1. 1. 5.
[සඞ්ඛිත්ත ධනසුත්තං]
[සාවත්ථිනිදානං]
5. සත්තිමානි භික්ඛවෙ, ධනානි. කතමානි සත්ත:
සද්ධාධනං, සීලධනං, හිරිධනං, ඔත්තප්පධනං, සුතධනං, චාගධනං, පඤ්ඤාධනං.
ඉමානි ඛො භික්ඛවෙ, සත්ත ධනානී’ති.
5. සද්ධාධනං සීලධනං හිරි ඔත්තප්පියං ධනං
සුතධනං ච චාගො ච පඤ්ඤා වෙ සත්තමං ධනං.
6. යස්ස එතෙ ධනා අත්ථි ඉත්ථියා පුරිසස්ස වා
අදළිද්දොති තං ආහු අමොඝං තස්ස ජීවිතං.
7. තස්මා සද්ධඤ්ච සීලඤ්ච, පසාදං ධම්මදස්සනං
අනුයුඤ්ජෙථ මෙධාවී සරං බුද්ධාන සාසනං’ති.
7. 1. 1. 6.
[විත්ථතධන සුත්තං]
[සාවත්ථිනිදානං]
6. සත්තිමානි භික්ඛවෙ, ධනානි, කතමානි සත්ත:
සද්ධාධනං, සීලධනං, හිරිධනං, ඔත්තප්පධනං, සුතධනං, චාගධනං, පඤ්ඤාධනං.
(1) කතමඤ්ච භික්ඛවෙ, සද්ධාධනං:
ඉධ භික්ඛවෙ, අරියසාවකො සද්ධො හොති. සද්දහති තථාගතස්ස බොධිං: ඉතිපි සො භගවා අරහං සම්මාසම්බුද්ධො -පෙ- බුද්ධො භගවාති ඉදං වුච්චති භික්ඛවෙ, සද්ධාධනං.