6. 1. 8.
[අසන්තුට්ඨි සුත්තං]
[සාවත්ථිනිදානං]
8. තයො මෙ භික්ඛවෙ ධම්මා. කතමෙ තයො:
අසන්තුට්ඨිතා, අසම්පජඤ්ඤං, මහිච්ඡතා, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
අසන්තුට්ඨිතාය පහානාය සන්තුට්ඨිතා භාවෙතබ්බා. අසම්පජඤ්ඤස්ස පහානාය සම්පජඤ්ඤං භාවෙතබ්බං. මහිච්ඡතාය පහානාය අප්පිච්ඡතා භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 9.
[දොවචස්සතා සුත්තං]
[සාවත්ථිනිදානං]
9. තයො මෙ භික්ඛවෙ ධම්මා. කතමෙ තයො:
දොවචස්සතා, පාපමිත්තතා, චෙතසො වික්ඛෙපො, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
දොවචස්සතාය පහානාය සොවචස්සතා භාවෙතබ්බා පාපමිත්තතාය පහානාය කල්යාණමිත්තතා භාවෙතබ්බා. චෙතසො වික්ඛෙපස්ස පහානාය ආනාපානසති භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 10.
[උද්ධච්ච සුත්තං]
[සාවත්ථිනිදානං]
10. තයො මෙ භික්ඛවෙ ධම්මා. කතමෙ තයො:
උද්ධච්චං, අසංවරො, පමාදො, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
උද්ධච්චස්ස පහානාය සමථො භාවෙතබ්බො. අසංවරස්ස පහානාය සංවරො භාවෙතබ්බො. පමාදස්ස පහානාය අප්පමාදො භාවෙතබ්බො
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
තික වග්ගො.
තස්සුද්දානං:
රාගදුච්චරිත විතක්කසඤ්ඤා ධාතූති වුච්චති,
අස්සාද අරතිතුට්ඨි දොව ච උද්ධච්චෙන වග්ගො’ති