6. 2. 5. 11.
[තණ්හා සුත්තං]
[සාවත්ථිනිදානං]
52. තිස්සො ඉමා භික්ඛවෙ තණ්හා පහාතබ්බා, තයො ච මානා.
කතමා තිස්සො තණ්හා පහාතබ්බා:
කාමතණ්හා, භවතණ්හා, විභවතණ්හා, ඉමා තිස්සො තණ්හා පහාතබ්බා.
කතමෙ තයො මානා පහාතබ්බා:
මානො, ඔමානො, අතිමානො. ඉමෙ තයො මානා පහාතබ්බා.
යතො ච ඛො භික්ඛවෙ භික්ඛුනො ඉමා තිස්සො තණ්හා පහීනා හොන්තී, ඉමෙ ච තයො මානා, අයං වුච්චති භික්ඛවෙ භික්ඛු අච්ඡෙච්ඡි තණ්හං, වාවත්තයී සංයොජනං, සම්මා මානාභිසමයා අන්තමකාසි දුක්ඛස්සාති.
ආනිසංස වග්ගො පඤ්චමො.
තස්සුද්දානං:
පාතුභාවො ආනිසංසො අනිච්ච දුක්ඛ අනත්තතො
නිබ්බානං අනවත්ථි උක්ඛිත්තාසි අතම්මයො
භවා තණ්හායෙකා දසාති. (මඡසං.)
දුතියො පණ්ණාසකො සමත්තො
පණ්ණාසකාතිරෙක වග්ගා
1. තික වග්ගො
6. 1. 1.
[රාග සුත්තං]
[සාවත්ථිනිදානං]
1. තයො මෙ භික්ඛවෙ ධම්මා. කතමෙ තයො:
රාගො, දොසො, මොහො. ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
රාගස්ස පහානාය අසුභා භාවෙතබ්බා. දොසස්ස පහානාය මෙත්තා භාවෙතබ්බා. මොහස්ස පහානාය පඤ්ඤා භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 2.
[දුච්චරිත සුත්තං]
[සාවත්ථිනිදානං]
2. තයො මෙ භික්ඛවෙ ධම්මා. කතමෙ තයො:
කායදුච්චරිතං, වචීදුච්චරිතං, මනොදුච්චරිතං. ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
කායදුච්චරිතස්ස පහානාය කායසුචරිතං භාවෙතබ්බං. වචීදුච්චරිතස්ස පහානාය වචීසුචරිතං භාවෙතබ්බං. මනොදුච්චරිතස්ස පහානාය මනො සුචරිතං භාවෙතබ්බං.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 3.
[විතක්ක සුත්තං]
[සාවත්ථිනිදානං]
3. තයො මෙ භික්ඛවෙ ධම්මා. කතමෙ තයො:
කාමවිතක්කො, ව්යාපාදවිතක්කො, විහිංසාවිතක්කො. ඉමෙ ඛො භික්ඛවෙ තයො ධම්මා.