47. අථ ඛො මොලියසීවකො පරිබ්බාජකො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො මොලියසීවකො පරිබ්බාජකො භගවන්තං එතදවොච:

‘සන්දිට්ඨිකො ධම්මො, සන්දිට්ඨිකො ධම්මො’ති භන්තෙ වුච්චති. කිත්තාවතා නු ඛො භන්තෙ සන්දිට්ඨිකො ධම්මො හොති, අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහීති?

තෙන හි සීවක තඤ්ඤෙවෙත්ථ පටිපුච්ඡිස්සාමි. යථා තෙ ඛමෙය්ය තථා නං ව්යාකරෙය්යාසි. තං කිං මඤ්ඤසි සීවක සන්තං වා අජ්ඣත්තං ලොභං “අත්ථි මෙ අජ්ඣත්තං ලොභොති” පජානාසි, අසන්තං වා අජ්ඣත්තං ලොභං “නත්ථි මෙ අජ්ඣත්තං ලොභොති” පජානාසීති.

එවං භන්තෙ.

යං ඛො ත්වං සීවක සන්තං වා අජ්ඣත්තං ලොභං “අත්ථි මෙ අජ්ඣත්තං ලොභොති” පජානාසි. අසන්තං වා අජ්ඣත්තං ලොභං “නත්ථි මෙ අජ්ඣත්තං ලොභොති”පජානාසි.

එවං ඛො සීවක සන්දිට්ඨිකො ධම්මො හොති -පෙ-

තං කිං මඤ්ඤසි සීවක සන්තං වා අජ්ඣත්තං දොසං -පෙ- සන්තං වා අජ්ඣත්තං මොහං -පෙ- සන්තං වා අජ්ඣත්තං ලොභධම්මං -පෙ- සන්තං වා අජ්ඣත්තං දොසධම්මං -පෙ- සන්තං වා අජ්ඣත්තං මොහධම්මං, “අත්ථි මෙ අජ්ඣත්තං මොහධම්මොති” පජානාසි, අසන්තං වා අජ්ඣත්තං මොහධම්මං, “නත්ථි මෙ අජ්ඣත්තං මොහ ධම්මොති” පජානාසීති.

එවං භන්තෙ.

යං ඛො ත්වං සීවක සන්තං වා අජ්ඣත්තං මොහධම්මං “අත්ථි මෙ අජ්ඣත්තං මොහධම්මොති පජානාසි, අසන්තං වා අජ්ඣත්තං මොහධම්මං “නත්ථි මෙ අජ්ඣත්තං මොහධම්මොති” පජානාසි.

එවං ඛො සීවක සන්දිට්ඨිකො ධම්මො හොති අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහීති.

අභික්කන්තං -පෙ- උපාසකං මං භන්තෙ භගවා ධාරෙතු අජ්ජතග්ගෙ පාණුපෙතං සරණං ගතන්ති.

48. අථ ඛො අඤ්ඤතරො බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො සො බ්රාහ්මණො භගවන්තං එතදවොච:

‘සන්දිට්ඨිකො ධම්මො සන්දිට්ඨිකො ධම්මො’ති භො ගොතම වුච්චති. කිත්තාවතා නු ඛො භො ගොතම සන්දිට්ඨිකො ධම්මො හොති, අකාලිකො එහිපස්සිකො ඔපනයිකො පච්චත්තං වෙදිතබ්බො විඤ්ඤූහීති?

තෙන හි බ්රාහ්මණ තඤ්ඤෙවෙත්ථ පටිපුච්ඡිස්සාමි. යථා තෙ ඛමෙය්ය තථා නං ව්යාකරොසි. තං කිං මඤ්ඤසි බ්රාහ්මණ, සන්තං වා අජ්ඣත්තං රාගං ‘අත්ථි මෙ අජ්ඣත්තං රාගොති’ පජානාසි, අසන්තං වා අජ්ඣත්තං රාගං ‘නත්ථි මෙ අජ්ඣත්තං රාගොති’ පජානාසීති.

එවං භො.