19. එකං සමයං භගවා නාදිකෙ විහරති ගිඤ්ජකාවසථෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:

මරණසති භික්ඛවෙ භාවිතා බහුලීකතා මහප්ඵලා හොති මහානිසංසා අමතොගධා අමතපරියොසානා. භාවෙථ නො තුම්හෙ භික්ඛවෙ මරණසතින්ති?

(1) එවං වුත්තෙ අඤ්ඤතරො භික්ඛු භගවන්තං එතදවොච: “අහං ඛො භන්තෙ භාවෙමි මරණසතින්ති.”

යථා කථං පන ත්වං භික්ඛු භාවෙසි මරණසතින්ති?

ඉධ මය්හං භන්තෙ එවං හොති: “අහො වතාහං රත්තින්දිවං ජීවෙය්යං, භගවතො සාසනං මනසි කරෙය්යං, බහුං වත මෙ කතං අස්සා”ති. එවං ඛො අහං භන්තෙ භාවෙමි මරණසතින්ති.

(2) අඤ්ඤතරොපි ඛො භික්ඛු භගවන්තං එතදවොච: අහම්පි ඛො භන්තෙ භාවෙමි මරණසතින්ති.

යථා කථං පන ත්වං භික්ඛු භාවෙසි මරණසතින්ති?

ඉධ මය්හං භන්තෙ එවං හොති: “අහො වතාහං දිවසං ජීවෙය්යං භගවතො සාසනං මනසි කරෙය්යං, බහුං වත මෙ කතං අස්සා”ති. එවං ඛො අහං භන්තෙ භාවෙමි මරණසතින්ති.

(3) අඤ්ඤතරොපි ඛො භික්ඛු භගවන්තං එතදවොච: අහම්පි ඛො භන්තෙ භාවෙමි මරණසතින්ති.

යථා කථම්පන ත්වං භික්ඛු භාවෙසි මරණසතින්ති?

ඉධ මය්හං භන්තෙ එවං හොති: “අහො වතාහං තදන්තරං ජීවෙය්යං යදන්තරං එකපිණ්ඩපාතං භුඤ්ජාමි, භගවතො සාසනං මනසි කරෙය්යං, බහුං වත මෙ කතං අස්සා”ති. එවං ඛො අහං භන්තෙ භාවෙමි මරණසතින්ති.

(4) අඤ්ඤතරොපි ඛො භික්ඛු භගවන්තං එතදවොච: අහම්පි ඛො භන්තෙ භාවෙමි මරණසතින්ති.

යථා කථං පන ත්වං භික්ඛු භාවෙසි මරණසතින්ති?

ඉධ මය්හං භන්තෙ එවං හොති: “අහො වතාහං තදන්තරං ජීවෙය්යං, යදන්තරං චත්තාරො පඤ්ච ආලොපෙ සඞ්ඛාදිත්වා අජ්ඣොහරාමි, භගවතො සාසනං මනසි කරෙය්යං, බහුං වත මෙ කතං අස්සා”ති. එවං ඛො අහං භන්තෙ භාවෙමි මරණසතින්ති.

(5) අඤ්ඤතරොපි ඛො භික්ඛු භගවන්තං එතදවොච: අහම්පි ඛො භන්තෙ භාවෙමි මරණසතින්ති.

යථා කථං පන ත්වං භික්ඛු භාවෙසි මරණසතින්ති?

ඉධ මය්හං භන්තෙ එවං හොති: “අහො වතාහං තදන්තරං ජීවෙය්යං, යදන්තරං එකං ආලොපං සඞ්ඛාදිත්වා අජ්ඣොහරාමි, භගවතො සාසනං මනසි කරෙය්යං, බහුං වත මෙ කතං අස්සා”ති එවං ඛො අහං භන්තෙ භාවෙමි මරණසතින්ති.