1. පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො න සම්මන්නිතබ්බො. කතමෙහි පඤ්චහි:

ඡන්දාගතිං ගච්ඡති, දොසාගතිං ගච්ඡති, මොහාගතිං ගච්ඡති, භයාගතිං ගච්ඡති, උද්දිට්ඨානුද්දිට්ඨං න ජානාති.

ඉමෙහි ඛො භික්ඛවෙ, පඤ්චහි ධම්මෙහි සමන්නාගතො භත්තුද්දෙසකො න සම්මන්නිතබ්බො.

පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො සම්මන්නිතබ්බො. කතමෙහි පඤ්චහි:

න ඡන්දාගතිං ගච්ඡති, න දොසාගතිං ගච්ඡති, න මොහාගතිං ගච්ඡති, න භයාගතිං ගච්ඡති, උද්දිට්ඨානුද්දිට්ඨං ජානාති.

ඉමෙහි ඛො භික්ඛවෙ, පඤ්චහි ධම්මෙහි සමන්නාගතො භත්තුද්දෙසකො සම්මන්නිතබ්බො’ති.

2-5. පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො න සම්මන්නිතබ්බො. සම්මතොපි න පෙසෙතබ්බො. [කතමෙහි පඤ්චහි: ඡන්දාගතිං ගච්ඡති] -පෙ-

[පඤ්චහි භික්ඛවෙ ධම්මෙහි සමන්නාගතො] භත්තුද්දෙසකො සම්මන්නිතබ්බො, සම්මතොපි පෙසෙතබ්බො. කතමෙහි පඤ්චහි: න ඡන්දාගතිං ගච්ඡති), -පෙ-

[පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො] බාලොවෙදිතබ්බො. [කතමෙහි පඤ්චහි: ඡන්දාගතිං ගච්ඡති] -පෙ-

[පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො] පණ්ඩිතො වෙදිතබ්බො. [කතමෙහි පඤ්චහි: න ඡන්දාගතිං ගච්ඡති] -පෙ-

[පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො] ඛතං උපහතං අත්තානං පරිහරති. -පෙ- [ඡන්දාගතිං ගච්ඡති -පෙ-]

[පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො] අක්ඛතං අනුපහතං අත්තානං පරිහරති. -පෙ- [න ඡන්දාගතිං ගච්ඡති -පෙ-]

[පඤ්චහි භික්ඛවෙ ධම්මෙහි සමන්නාගතො භත්තුද්දෙසකො] යථාභතං නික්ඛිත්තො එවං නිරයෙ -පෙ- [ඡන්දාගතිං ගච්ඡති -පෙ-]

[පඤ්චහි භික්ඛවෙ, ධම්මෙහි සමන්නාගතො භත්තුද්දෙසකො] යථාභතං නික්ඛිත්තො එවං සග්ගෙ. කතමෙහි පඤ්චහි:

න ඡන්දාගතිං ගච්ඡති, න දොසාගතිං ගච්ඡති, න මොහාගතිං ගච්ඡති, න භයාගතිං ගච්ඡති, උද්දිට්ඨානුද්දිට්ඨං ජානාති.

ඉමෙහි ඛො භික්ඛවෙ පඤ්චහි ධම්මෙහි සමන්නාගතො භත්තුද්දෙසකො යථාභතං නික්ඛිත්තො එවං සග්ගෙ’ති.

6. පඤ්චහි භික්ඛවෙ ධම්මෙහි සමන්නාගතො සෙනාසනපඤ්ඤාපකො න සම්මන්නිතබ්බො. කතමෙහි පඤ්චහි:

ඡන්දාගතිං ගච්ඡති, දොසාගතිං ගච්ඡති, මොහාගතිං ගච්ඡති, භයාගතිං ගච්ඡති, පඤ්ඤත්තාපඤ්ඤත්තං න ජානාති.

ඉමෙහි ඛො භික්ඛවෙ පඤ්චහි ධම්මෙහි සමන්නාගතො සෙනාසනපඤ්ඤාපකො න සම්මන්නිතබ්බො.

පඤ්චහි භික්ඛවෙ, ධම්මෙහි සමන්නාගතො සෙනාසනපඤ්ඤාපකො සම්මන්නිතබ්බො. කතමෙහි පඤ්චහි:

න ඡන්දාගතිං ගච්ඡති, න දොසාගතිං ගච්ඡති, න මොහාගතිං ගච්ඡති, න භයාගතිං ගච්ඡති, පඤ්ඤත්තාපඤ්ඤත්තං ජානාති

ඉමෙහි ඛො භික්ඛවෙ පඤ්චහි ධම්මෙහි සමන්නාගතො සෙනාසනපඤ්ඤාපකො සම්මන්නිතබ්බො’ති.

7. පඤ්චහි භික්ඛවෙ, ධම්මෙහි සමන්නාගතො සෙනාසනගාහාපකො න සම්මන්නිතබ්බො. -පෙ- [ඡන්දාගතිං ගච්ඡති -පෙ-] ගහිගාගහිතං න ජානාති -පෙ-

[පඤ්චහි භික්ඛවෙ ධම්මෙහි සමන්නාගතො] සෙනාසනගාහාපකො සම්මන්නිතබ්බො. -පෙ- [ඡන්දාගතිං ගච්ඡති -පෙ-] ගහිතාගහිතං ජානාති. -පෙ-

8. [පඤ්චහි භික්ඛවෙ ධම්මෙහි සමන්නාගතො] භණ්ඩාගාරිකො න සම්මන්නිතබ්බො. -පෙ- (ඡන්දාගතිං ගච්ඡති -පෙ-) ගුත්තාගුත්තං න ජානාති -පෙ-

[පඤ්චහි භික්ඛවෙ ධම්මෙහි සමන්නාගතො] භණ්ඩාගාරිකො සම්මන්නිතබ්බො -පෙ- [ඡන්දාගතිං ගච්ඡති -පෙ-] ගුත්තාගුත්තං ජානාති -පෙ-

9. [පඤ්චහි භික්ඛවෙ, ධම්මෙහි සමන්නාගතො] චීවරපටිග්ගාහකො න සම්මන්නිතබ්බො. -පෙ- [ඡන්දාගතිං ගච්ඡති -පෙ-] ගහිතාගහිතං න ජානාති -පෙ-

[පඤ්චහි භික්ඛවෙ ධම්මෙහි සමන්නාගතො] චීවරපටිග්ගාහකො සම්මන්නිතබ්බො -පෙ- ගහිතාගහිතං ජානාති -පෙ-