44. එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො භගවා පුබ්බන්හසමයං නිවාසෙත්වා පත්තචීවරමාදාය යෙන උග්ගස්ස ගහපතිනො වෙසාලිකස්ස නිවෙසනං තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි. අථ ඛො උග්ගො ගහපති වෙසාලිකො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො උග්ගො ගහපති වෙසාලිකො භගවන්තං එතදවොච:

“සම්මුඛා මෙතං භන්තෙ භගවතො සුතං සම්මුඛා පටිග්ගහීතං ‘මනාපදායී ලභතෙ මනාප’න්ති. මනාපං මෙ භන්තෙ සාලපුප්ඵකං ඛාදනීයං. තං මෙ භගවා පතිගණ්හාතු අනුකම්පං උපාදායා”ති. පටිග්ගහෙසි භගවා අනුකම්පං උපාදාය.

“සම්මුඛා මෙතං භන්තෙ භගවතො සුතං සම්මුඛා පටිග්ගහීතං ‘මනාපදායී ලභතෙ මනාප’න්ති මනාපං මෙ භන්තෙ සම්පන්නකොලකං, සම්පන්නසූකරමංසං. තං මෙ භගවා පතිගණ්හාතු අනුකම්පං උපාදායා”ති. පටිග්ගහෙසි භගවා අනුකම්පං උපාදාය.

“සම්මුඛා මෙතං භන්තෙ භගවතො සුතං, සම්මුඛා පටිග්ගහීතං ‘මනාපදායී ලභතෙ මනාප’න්ති. මනාපං මෙ භන්තෙ නිබද්ධතෙලකං නාළියසාකං. තං මෙ භගවා පතිගණ්හාතු අනුකම්පං උපාදායා”ති. පටිග්ගහෙසි භගවා අනුකම්පං උපාදාය.

“සම්මුඛා මෙතං භන්තෙ භගවතො සුතං, සම්මුඛා පටිග්ගහීතං ‘මනාපදායී ලභතෙ මනාප’න්ති. මනාපං මෙ භන්තෙ සාලීනං ඔදනො විචිතකාළකො අනෙකසූපො අනෙකබ්යඤ්ජනො. තං මෙ භගවා පතිගණ්හාතු අනුකම්පං උපාදායා”ති. පටිග්ගහෙසි භගවා අනුකම්පං උපාදාය.

“සම්මුඛා මෙතං භන්තෙ භගවතො සුතං, සම්මුඛා පටිග්ගහීතං ‘මනාපදායී ලභතෙ මනාප’න්ති. මනාපානි මෙ භන්තෙ කාසිකානි වත්ථානි. තානි මෙ භගවා පතිගණ්හාතු අනුකම්පං උපාදායා”ති. පටිග්ගහෙසි භගවා අනුකම්පං උපාදාය.

“සම්මුඛා මෙතං භන්තෙ භගවතො සුතං, සම්මුඛා පටිග්ගහීතං ‘මනාපදායී ලභතෙ මනාප’න්ති. මනාපො මෙ භන්තෙ පල්ලඞ්කො ගොණකත්ථතො පටිකත්ථතො පටලිකත්ථතො කාදලිමිගපවරපච්චත්ථරණො සඋත්තරච්ඡදො උභතො ලොහිතකූපධානො. අපි ච භන්තෙ මයම්පෙතං ජානාම ‘නෙතං භගවතො කප්පතී’ති. ඉදං මෙ භන්තෙ චන්දනඵලකං අග්ඝති අධිකං සහස්සං. තං මෙ භගවා පතිගණ්හාතු අනුකම්පං උපාදායා”ති පටිග්ගහෙසි භගවා අනුකම්පං උපාදාය.

අථ ඛො භගවා උග්ගං ගහපතිං වෙසාලිකං ඉමිනා අනුමොදනීයෙන අනුමොදි:

අථ ඛො භගවා උග්ගං ගහපතිං වෙසාලිකං ඉමිනා අනුමොදනීයෙන අනුමොදිත්වා උට්ඨායාසනා පක්කාමි. අථ ඛො උග්ගො ගහපති වෙසාලිකො අපරෙන සමයෙන කාලමකාසි. කාලකතො ච උග්ගො ගහපති වෙසාලිකො අඤ්ඤතරං මනොමයං කායං උපපජ්ජී.