7. යෙභුය්යෙන භික්ඛවෙ සත්තා කාමෙසු පලාළිතා. අසිතව්යාභඞ්ගිං භික්ඛවෙ කුලපුත්තො ඔහාය අගාරස්මා අනගාරියං පබ්බජිතො හොති, ‘සද්ධාපබ්බජිතො කුලපුත්තො’ති අලං වචනාය. තං කිස්ස හෙතු:

ලබ්භා භික්ඛවෙ යොබ්බනෙන කාමා. තෙ ච ඛො යාදිසා වා තාදිසා වා යෙ ච භික්ඛවෙ හීනා කාමා, යෙ ච මජ්ඣිමා කාමා, යෙ ච පණීතා කාමා සබ්බෙ කාමා ‘කාමා‘ත්වෙව සඞ්ඛං ගච්ඡන්ති.

සෙය්යථාපි භික්ඛවෙ දහරො කුමාරො මන්දො උත්තානසෙය්යකො ධාතියා පමාදමන්වාය කට්ඨං වා කඨලං වා මුඛෙ ආහරෙය්ය, තමෙනං ධාති සීඝසීඝං මනසි කරෙය්ය, සීඝසීඝං මනසි කරිත්වා සීඝසීඝං ආහරෙය්ය, නො චෙ සක්කුණෙය්ය සීඝසීඝං ආහරිතුං වාමෙන හත්ථෙන සීසං පරිග්ගහෙත්වා දක්ඛිණෙන හත්ථෙන වඞ්කඞ්ගුලිං කරිත්වා සලොහිතම්පි ආහරෙය්ය. තං කිස්ස හෙතු: අත්ථෙසා භික්ඛවෙ කුමාරස්ස විහෙසා, නෙසා නත්ථීති වදාමි. කරණීයඤ්ච ඛො එතං භික්ඛවෙ ධාතියා අත්ථකාමාය හිතෙසිනියා අනුකම්පිකාය අනුකම්පං උපාදාය.

යතො ච ඛො සො භික්ඛවෙ කුමාරො වුද්ධො හොති අලංපඤ්ඤො අනපෙක්ඛා පන භික්ඛවෙ ධාති තස්මිං කුමාරෙ හොති ‘අත්තගුත්තොදානි කුමාරො නාලං පමාදායා’ති.

එවමෙව ඛො භික්ඛවෙ යාවකීවඤ්ච භික්ඛුනො සද්ධාය අකතං හොති කුසලෙසු ධම්මෙසු, හිරියා අකතං හොති කුසලෙසු ධම්මෙසු, ඔත්තප්පෙන අකතං හොති කුසලෙසු ධම්මෙසු, විරියෙන අකතං හොති කුසලෙසු ධම්මෙසු, පඤ්ඤාය අකතං හොති කුසලෙසු ධම්මෙසු, අනුරක්ඛිතබ්බො තාව මෙ සො භික්ඛවෙ භික්ඛු හොති.

යතො ච ඛො භික්ඛවෙ භික්ඛුනො සද්ධාය කතං හොති කුසලෙසු ධම්මෙසු, හිරියා කතං හොති කුසලෙසු ධම්මෙසු, ඔත්තප්පෙන කතං හොති කුසලෙසු ධම්මෙසු, විරියෙන කතං හොති කුසලෙසු ධම්මෙසු, පඤ්ඤාය කතං හොති කුසලෙසු ධම්මෙසු, අනපෙඛො දානාහං භික්ඛවෙ තස්මිං භික්ඛුස්මිං හොමි ‘අත්තගුත්තොදානි භික්ඛු නාලං පමාදායා’ති.

8. පඤ්චහි භික්ඛවෙ ධම්මෙහි සමන්නාගතො භික්ඛු චවති, නප්පතිට්ඨාති සද්ධම්මෙ. කතමෙහි පඤ්චහි:

අස්සද්ධො භික්ඛවෙ භික්ඛු චවති, නප්පතිට්ඨාති සද්ධම්මෙ. අහිරිකො භික්ඛවෙ භික්ඛු චවති, නප්පතිට්ඨාති සද්ධම්මෙ. අනොත්තප්පී භික්ඛවෙ භික්ඛු චවති, නප්පතිට්ඨාති සද්ධම්මෙ. කුසීතො භික්ඛවෙ භික්ඛු චවති, නප්පතිට්ඨාති සද්ධම්මෙ. දුප්පඤ්ඤො භික්ඛවෙ භික්ඛු චවති, නප්පතිට්ඨාති සද්ධම්මෙ.

ඉමෙහි ඛො භික්ඛවෙ පඤ්චහි ධම්මෙහි සමන්නාගතො භික්ඛු චවති, නප්පතිට්ඨාති සද්ධම්මෙ.