4. 5. 5. 4.
[සෙය්යාසුත්තං]
46. චතස්සො ඉමා භික්ඛවෙ සෙය්යා. කතමා චතස්සො?
පෙතසෙය්යා, කාමභොගීසෙය්යා, සීහසෙය්යා, තථාගතසෙය්යා.
කතමා ච භික්ඛවෙ පෙතසෙය්යා? යෙභුය්යෙන භික්ඛවෙ පෙතා උත්තානා සෙන්ති. අයං වුච්චති භික්ඛවෙ පෙතසෙය්යා.
කතමා ච භික්ඛවෙ කාමභොගීසෙය්යා? යෙභුය්යෙන භික්ඛවෙ කාමභොගී වාමෙන පස්සෙන සෙන්ති. අයං වුච්චති භික්ඛවෙ කාමභොගීසෙය්යා.
කතමා ච භික්ඛවෙ සීහසෙය්යා? සීහො භික්ඛවෙ මිගරාජා දක්ඛිණෙන පස්සෙන සෙය්යං කප්පෙති පාදෙ පාදං අච්චාධාය, අන්තරා සත්ථීනං නඞ්ගුට්ඨං අනුක්ඛිපිත්වා. සො පටිබුජ්ඣිත්වා පුරිමං කායං අබ්භුන්නාමෙත්වා පච්ඡිමං කායං අනුවිලොකෙති. සචෙ භික්ඛවෙ සීහො මිගරාජා කිඤ්චි පස්සති කායස්ස වික්ඛිත්තං වා විසටං වා, තෙන භික්ඛවෙ සීහො මිගරාජා අනත්තමනො හොති. සචෙ පන භික්ඛවෙ සීහො මිගරාජා න කිඤ්චි පස්සති කායාස්ස වික්ඛිත්තං වා විසටං වා, තෙන භික්ඛවෙ සීහො මිගරාජා අත්තමනො හොති. අයං වුච්චති භික්ඛවෙ සීහසෙය්යා.
කතමා ච භික්ඛවෙ තථාගතසෙය්යා? ඉධ භික්ඛවෙ තථාගතො විවිච්චෙව කාමෙහි [-පෙ- පඨමං ඣානං -පෙ- දුතියං ඣානං -පෙ- තතියං ඣානං] -පෙ- චතුත්ථං ඣානං උපසම්පජ්ජ විහරති. අයං වුච්චති භික්ඛවෙ තථාගතසෙය්යා.
ඉමා ඛො භික්ඛවෙ චතස්සො සෙය්යාති.
4. 5. 5. 5.
[ථූපාරහසුත්තං]
47. චත්තාරොමෙ භික්ඛවෙ ථූපාරහා. කතමෙ චත්තාරො?
තථාගතො අරහං සම්මාසම්බුද්ධො ථූපාරහො, පච්චෙකබුද්ධො ථූපාරහො, තථාගතසාවකො ථූපාරහො, රාජා චක්කවත්තී ථූපාරහො.
ඉමෙ ඛො භික්ඛවෙ චත්තාරො ථූපාරහාති.
4. 5. 5. 6.
[පඤ්ඤාවුද්ධි සුත්තං]
48. චත්තාරොමෙ භික්ඛවෙ ධම්මා පඤ්ඤාවුද්ධියා සංවත්තන්තී. කතමෙ චත්තාරො?
සප්පුරිසසංසෙවො, සද්ධම්මසවණං, යොනිසො මනසිකාරො, ධම්මානුධම්මපටිපත්ති.
ඉමෙ ඛො භික්ඛවෙ චත්තාරො ධම්මා පඤ්ඤාවුද්ධියා සංවත්තන්තීති.
4. 5. 5. 7.
[බහුකාරසුත්තං]
49. චත්තාරොමෙ භික්ඛවෙ ධම්මා මනුස්සභූතස්ස බහුකාරා හොන්ති. කතමෙ චත්තාරො?
සප්පුරිසසංසෙවො, සද්ධම්මසවණං, යොනිසො මනසිකාරො, ධම්මානුධම්මපටිපත්ති.
ඉමෙ ඛො භික්ඛවෙ චත්තාරො ධම්මා මනුස්සභූතස්ස බහුකාරා හොන්තීති.
4. 5. 5. 8.
[අනරිය වොහාරසුත්තං]
50. චත්තාරොමෙ භික්ඛවෙ අනරියවොහාරා. කතමෙ චත්තාරො?
අදිට්ඨෙ දිට්ඨවාදිතා, අසුතෙ සුතවාදිතා, අමුතෙ මුතවාදිතා, අවිඤ්ඤාතෙ විඤ්ඤාතවාදිතා.
ඉමෙ ඛො භික්ඛවෙ චත්තාරො අනරියවොහාරාති.
4. 5. 5. 9.
[අරියවොහාරසුත්තං]
51. චත්තාරොමෙ භික්ඛවෙ අරියවොහාරා. කතමෙ චත්තාරො?
අදිට්ඨෙ අදිට්ඨවාදිතා, අසුතෙ අසුතවාදිතා, අමුතෙ අමුතවාදිතා, අවිඤ්ඤාතෙ අවිඤ්ඤාතවාදිතා.
ඉමෙ ඛො භික්ඛවෙ චත්තාරො අරියවොහාරාති.
4. 5. 5. 10.
[අනරිය වොහාරසුත්තං]
52. චත්තාරොමෙ භික්ඛවෙ අනරියවොහාරා. කතමෙ චත්තාරො?
දිට්ඨෙ අදිට්ඨවාදිතා, සුතෙ අසුතවාදිතා, මුතෙ අමුතවාදිතා, විඤ්ඤාතෙ අවිඤ්ඤාතවාදිතා.
ඉමෙ ඛො භික්ඛවෙ චත්තාරො අනරියවොහාරාති.
4. 5. 5. 11.
[අරියවොහාරසුත්තං]
53. චත්තාරොමෙ භික්ඛවෙ අරියවොහාරා. කතමෙ චත්තාරො?
දිට්ඨෙ දිට්ඨවාදිතා, සුතෙ සුතවාදිතා, මුතෙ මුතවාදිතා, විඤ්ඤාතෙ විඤ්ඤාතවාදිතා.
ඉමෙ ඛො භික්ඛවෙ චත්තාරො අරියවොහාරාති.
ආපත්තිභයවග්ගො පඤ්චමො
පණ්ණාසකං පඤ්චමං.