4. 3. 5. 8.
[වචීදුච්චරිතසුත්තං]
48. චත්තාරිමානි භික්ඛවෙ වචීදුච්චරිතානි. කතමානි චත්තාරි?
මුසාවාදො, පිසුනාවාචා, ඵරුසාවාචා, සම්ඵප්පලාපො.
ඉමානි ඛො භික්ඛවෙ චත්තාරි වචීදුච්චරිතානි.
4. 3. 5. 9.
[වචීසුචරිතසුත්තං]
49. චත්තාරිමානි භික්ඛවෙ වචීසුචරිතානි. කතමානි චත්තාරි?
සච්චවාචා, අපිසුනවාචා, සණ්හවාචා, මන්තාභාසා.
ඉමානි ඛො භික්ඛවෙ චත්තාරි වචීසුචරිතානීති.
4. 3. 5. 10.
[සාරසුත්තං]
50. චත්තාරොමෙ භික්ඛවෙ සාරා. කතමෙ චත්තාරො?
සීලසාරො, සමාධිසාරො, පඤ්ඤාසාරො, විමුත්තිසාරො.
ඉමෙ ඛො භික්ඛවෙ චත්තාරො සාරාති.
ආභාවග්ගො පඤ්චමො.
තතියො පණ්ණාසකො.