4. 3. 4. 9.
[ධම්මකථිකසුත්තං]
39. චත්තාරොමෙ භික්ඛවෙ ධම්මකථිකා. කතමෙ චත්තාරො?
ඉධ භික්ඛවෙ එකච්චො ධම්මකථිකො අප්පං ච භාසති අසහිතඤ්ච. පරිසා ච න කුසලා හොති සහිතාසහිතස්ස. එවරූපො භික්ඛවෙ ධම්මකථිකො එවරූපාය පරිසාය ධම්මකථිකොත්වෙව සඞ්ඛං ගච්ඡති.
ඉධ පන භික්ඛවෙ එකච්චො ධම්මකථිකො අප්පඤ්ච භාසති සහිතඤ්ච, පරිසා ච කුසලා හොති සහිතාසහිතස්ස. එවරූපො භික්ඛවෙ ධම්මකථිකො එවරූපාය පරිසාය ධම්මකථිකොත්වෙව සඞ්ඛං ගච්ඡති.
ඉධ පන භික්ඛවෙ එකච්චො ධම්මකථිකො බහුඤ්ච භාසති අසහිතඤ්ච. පරිසා ච න කුසලා හොති සහිතාසහිතස්ස. එවරූපො භික්ඛවෙ ධම්මකථිකො එවරූපාය පරිසාය ධම්මකථිකොත්වෙව සඞ්ඛං ගච්ඡති.
ඉධ පන භික්ඛවෙ එකච්චො ධම්මකථිකො බහුඤ්ච භාසති සහිතඤ්ච. පරිසා ච කුසලා හොති සහිතාසහිතස්ස. එවරූපො භික්ඛවෙ ධම්මකථිකො එවරූපාය පරිසාය ධම්මකථිකොත්වෙව සඞ්ඛං ගච්ඡති.
ඉමෙ ඛො භික්ඛවෙ චත්තාරො ධම්මකථිකාති.
4. 3. 4. 10.
[වාදීසුත්තං]
40. චත්තාරොමෙ භික්ඛවෙ වාදී. කතමෙ චත්තාරො?
අත්ථි භික්ඛවෙ වාදී අත්ථතො පරියාදානං ගච්ඡති නො ව්යඤ්ජනතො. අත්ථි භික්ඛවෙ වාදී ව්යඤ්ජනතො පරියාදානං ගච්ඡති නො අත්ථතො. අත්ථි භික්ඛවෙ වාදී අත්ථතො ච ව්යඤ්ජනතො ච පරියාදානං ගච්ඡති. අත්ථි භික්ඛවෙ වාදී නෙවත්ථතො නො ව්යඤ්ජනතො පරියාදානං ගච්ඡති.
ඉමෙ ඛො භික්ඛවෙ චත්තාරො වාදී. අට්ඨානමෙතං භික්ඛවෙ අනවකාසො, යං චතූහි පටිසම්භිදාහි සමන්නාගතො භික්ඛු අත්ථතො ච ව්යඤ්ජනතො ච පරියාදානං ගච්ඡෙය්යාති.
පුග්ගලවග්ගො චතුත්ථො.
5. ආභාවග්ගො
4. 3. 5. 1.
[ආභාසුත්තං]
[සාවත්ථිනිදානං]
41. චතස්සො ඉමා භික්ඛවෙ ආභා. කතමා චතස්සො?
චන්දාභා, සූරියාභා, අග්ගාභා, පඤ්ඤාභා.
ඉමා ඛො භික්ඛවෙ චතස්සො ආභා. එතදග්ගං භික්ඛවෙ ඉමාසං චතස්සන්නං ආභානං යදිදං පඤ්ඤාභාති.
4. 3. 5. 2.
[පභාසුත්තං]
42. චතස්සො ඉමා භික්ඛවෙ පභා. කතමා චතස්සො?
චන්දප්පභා, සුරියප්පභා, අග්ගිප්පභා, පඤ්ඤාපභා.
ඉමා ඛො භික්ඛවෙ චතස්සො පභා. එතදග්ගං භික්ඛවෙ ඉමාසං චතස්සන්නං පභානං යදිදං පඤ්ඤාපභාති.