38. පනුන්නපච්චෙකසච්චො භික්ඛවෙ, භික්ඛු සමවයසට්ඨෙසනො පස්සද්ධකායසඞ්ඛාරො පතිලීනොති වුච්චති.

කථඤ්ච භික්ඛවෙ, භික්ඛු පනුන්නපච්චෙකසච්චො හොති? ඉධ භික්ඛවෙ, භික්ඛුනො යානි තානි පුථුසමණබ්රාහ්මණානං පුථුපච්චෙකසච්චානි සෙය්යථිදං: සස්සතො ලොකොති වා අසස්සතො ලොකොති වා අන්තවා ලොකොති වා අනන්තවා ලොකොති වා තං ජීවං තං සරීරන්ති වා අඤ්ඤං ජීවං අඤ්ඤං සරීරන්ති වා හොති තථාගතො පරම්මරණාති වා න හොති තථාගතො පරම්මරණාති වා හොති ච න හොති තථාගතො පරම්මරණාති වා නෙව හොති න න හොති තථාගතො පරම්මරණාති වා සබ්බානිස්ස තානි පනුන්නානි හොන්ති, චත්තානි වන්තානි මුත්තානි පහීණානි පටිනිස්සට්ඨානි. එවං ඛො භික්ඛවෙ, භික්ඛු පනුන්නපච්චෙකසච්චො හොති.

කථඤ්ච භික්ඛවෙ, භික්ඛු සමවයසට්ඨෙසනො හොති? ඉධ භික්ඛවෙ, භික්ඛුනො කාමෙසනා පහීණා හොති, භවෙසනා පහීණා හොති, බ්රහ්මචරියෙසනා පටිප්පස්සද්ධා. එවං ඛො භික්ඛවෙ, භික්ඛු සමවයසට්ඨෙසනො හොති.

කථඤ්ච භික්ඛවෙ, භික්ඛු පස්සද්ධකායසඞ්ඛාරො හොති? ඉධ භික්ඛවෙ, භික්ඛු සුඛස්ස ච පහානා දුක්ඛස්ස ච පහානා පුබ්බෙව සොමනස්සදොමනස්සානං අත්ථඞ්ගමා අදුක්ඛං අසුඛං උපෙක්ඛාසතිපාරිසුද්ධිං චතුත්ථං ඣානං උපසම්පජ්ජ විහරති. එවං ඛො භික්ඛවෙ, භික්ඛු පස්සද්ධකායසඞ්ඛාරො හොති.

කථඤ්ච භික්ඛවෙ, භික්ඛු පතිලීනො හොති? ඉධ භික්ඛවෙ, භික්ඛුනො අස්මිමානො පහීණො හොති. උච්ඡින්නමූලො, තාලාවත්ථුකතො අනභාවකතො, ආයතිං අනුප්පාදධම්මො. එවං ඛො භික්ඛවෙ, භික්ඛු පතිලීනො හොති.

පනුන්නපච්චෙකසච්චො භික්ඛවෙ, භික්ඛු සමවයසට්ඨෙසනො පස්සද්ධකායසඞ්ඛාරො පතිලීනොති වුච්චතීති.