19. තීණිමානි භික්ඛවෙ, සොචෙය්යානි. කතමානි තීණි : කායසොචෙය්යං, වචීසොචෙය්යං, මනොසොචෙය්යං.

කතමඤ්ච භික්ඛවෙ, කායසොචෙය්යං?

ඉධ භික්ඛවෙ, භික්ඛු පාණාතිපාතා පටිවිරතො හොති, අදින්නාදානා පටිවිරතො හොති, අබ්රහ්මචරියා පටිවිරතො හොති. ඉදං වුච්චති භික්ඛවෙ, කායසොචෙය්යං.

කතමඤ්ච භික්ඛවෙ, වචීසොචෙය්යං?

ඉධ භික්ඛවෙ, භික්ඛු මුසාවාදා පටිවිරතො හොති, පිසුණාවාචා පටිවිරතො හොති, ඵරුසාවාචා පටිවිරතො හොති, සම්ඵප්පලාපා පටිවිරතො හොති. ඉදං වුච්චති භික්ඛවෙ, වචීසොචෙය්යං.

කතමඤ්ච භික්ඛවෙ, මනොසොචෙය්යං?

ඉධ භික්ඛවෙ, භික්ඛු සන්තං වා අජ්ඣත්තං කාමච්ඡන්දං අත්ථි මෙ අජ්ඣත්තං කාමච්ඡන්දොති පජානාති. අසන්තං වා අජ්ඣත්තං කාමච්ඡන්දං නත්ථි මෙ අජ්ඣත්තං කාමච්ඡන්දොති පජානාති. යථා ච අනුප්පන්නස්ස කාමච්ඡන්දස්ස උප්පාදො හොති, තඤ්ච පජානාති. යථා ච උප්පන්නස්ස කාමච්ඡන්දස්ස පහාණං හොති. තඤ්ච පජානාති. යථා ච පහීණස්ස කාමච්ඡන්දස්ස ආයතිං අනුප්පාදො හොති. තඤ්ච පජානාති.

සන්තං වා අජ්ඣත්තං ව්යාපාදං අත්ථි මෙ අජ්ඣත්තං ව්යාපාදොති පජානාති. අසන්තං වා අජ්ඣත්තං ව්යාපාදං නත්ථි මෙ අජ්ඣත්තං ව්යාපාදොති පජානාති. යථා ච අනුප්පන්නස්ස ව්යාපාදස්ස උප්පාදො හොති, තඤ්ච පජානාති. යථා ච උප්පන්නස්ස ව්යාපාදස්ස පහාණං හොති, තඤ්ච පජානාති. යථා ච පහීණස්ස ව්යාපාදස්ස ආයතිං අනුප්පාදො හොති, තඤ්ච පජානාති.

සන්තං වා අජ්ඣත්තං ථිනමිද්ධං අත්ථි මෙ අජ්ඣත්තං ථිනමිද්ධන්ති පජානාති. අසන්තං වා අජ්ඣත්තං ථිනමිද්ධං නත්ථි මෙ අජ්ඣත්තං ථීනමිද්ධන්ති පජානාති. යථා ච අනුප්පන්නස්ස ථීනමිද්ධස්ස උප්පාදො හොති, තඤ්ච පජානාති. යථා ච උප්පන්නස්ස ථීනමිද්ධස්ස පහාණං හොති, තඤ්ච පජානාති. යථා ච පහීණස්ස ථීනමිද්ධස්ස ආයතිං අනුප්පාදො හොති, තඤ්ච පජානාති.

සන්තං වා අජ්ඣත්තං උද්ධච්චකුක්කුච්චං අත්ථි මෙ අජ්ඣත්තං උද්ධච්චකුක්කුච්චන්ති පජානාති. අසන්තං වා අජ්ඣත්තං උද්ධච්චකුක්කුච්චං නත්ථි මෙ අජ්ඣත්තං උද්ධච්චකුක්කුච්චන්ති පජානාති. යථා ච අනුප්පන්නස්ස උද්ධච්චකුක්කුච්චස්ස උප්පාදො හොති, තඤ්ච පජානාති. යථා ච උප්පන්නස්ස උද්ධච්චකුක්කුච්චස්ස පහාණං හොති, තඤ්ච පජානාති. යථා ච පහීණස්ස උද්ධච්චකුක්කුච්චස්ස ආයතිං අනුප්පාදො හොති, තඤ්ච පජානාති.

සන්තං වා අජ්ඣත්තං විචිකිච්ඡං අත්ථි මෙ අජ්ඣත්තං විචිකිච්ඡාති පජානාති. අසන්තං වා අජ්ඣත්තං විචිකිච්ඡං නත්ථි මෙ අජ්ඣත්තං විචිකිච්ඡාති පජානාති. යථා ච අනුප්පන්නාය විචිකිච්ඡාය උප්පාදො හොති, තඤ්ච පජානාති. යථා ච උප්පන්නාය විචිකිච්ඡාය පහාණං හොති, තඤ්ච පජානාති. යථා ච පහීණාය විචිකිච්ඡාය ආයතිං අනුප්පාදො හොති, තඤ්ච පජානාති.

ඉදං වුච්චති භික්ඛවෙ, මනොසොචෙය්යං.

ඉමානි ඛො භික්ඛවෙ, තීණි සොචෙය්යානීති.

20. තීණිමානි භික්ඛවෙ, මොනෙය්යානි. කතමානි තීණි : කායමොනෙය්යං, වචීමොනෙය්යං, මනොමොනෙය්යං.

කතමඤ්ච භික්ඛවෙ, කායමොනෙය්යං?

ඉධ භික්ඛවෙ, භික්ඛු පාණාතිපාතා පටිවිරතො හොති. අදින්නාදානා පටිවිරතො හොති. අබ්රහ්මචරියා පටිවිරතො හොති. ඉදං වුච්චති භික්ඛවෙ, කායමොනෙය්යං.

කතමඤ්ච භික්ඛවෙ, වචීමොනෙය්යං?

ඉධ භික්ඛවෙ, භික්ඛු මුසාවාදා පටිවිරතො හොති. පිසුණාවාචා පටිවිරතො හොති. ඵරුසාවාචා පටිවිරතො හොති. සම්ඵප්පලාපා පටිවිරතො හොති. ඉදං වුච්චති භික්ඛවෙ, වචීමොනෙය්යං.

කතමඤ්ච භික්ඛවෙ, මනොමොනෙය්යං?

ඉධ භික්ඛවෙ, භික්ඛු ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරති. ඉදං වුච්චති භික්ඛවෙ, මනොමොනෙය්යං.

ඉමානි ඛො භික්ඛවෙ, තීණි මොනෙය්යානීති.