30. අථ ඛො ආයස්මා ආනන්දො යෙන භගවා තෙනුපසඞ්කමි -පෙ- එකමන්තං නිසින්නො ඛො ආයස්මා ආනන්දො භගවන්තං එතදවොච : සම්මුඛාමෙතං භන්තෙ, භගවතො සුතං, සම්මුඛා පටිග්ගහිතං : “භගවතො ආනන්ද, සිඛිස්ස අභිභූ නාම සාවකො බ්රහ්මලොකෙ ඨිතො සහස්සීලොකධාතුං සරෙන විඤ්ඤාපෙසී”ති. භගවා පන භන්තෙ, අරහං සම්මාසම්බුද්ධො කීවතකං පහොති සරෙන විඤ්ඤාපෙතුන්ති.

සාවකො සො ආනන්ද, අප්පමෙය්යා තථාගතාති.

දුතියම්පි ඛො ආයස්මා ආනන්දො භගවන්තං එතදවොච : සම්මුඛා මෙතං භන්තෙ, -පෙ- සාවකො සො, ආනන්ද, අප්පමෙය්යා තථාගතාති.

තතියම්පි ඛො ආයස්මා ආනන්දො භගවන්තං එතදවොච : සම්මුඛා මෙතං භන්තෙ, භගවතො සුතං සම්මුඛා පටිග්ගහීතං : “භගවතො ආනන්ද, සිඛිස්ස අභිභූ නාම සාවකො බ්රහ්මලොකෙ ඨිතො සහස්සීලොකධාතුං සරෙන විඤ්ඤාපෙසී”ති. භගවා පන භන්තෙ, අරහං සම්මාසම්බුද්ධො කීවතකං පහොති සරෙන විඤ්ඤාපෙතුන්ති.

සුතා තෙ ආනන්ද, සහස්සී චූළනිකා ලොකධාතූති :

එතස්ස භගවා කාලො. එතස්ස සුගත, කාලො. යං භගවා භාසෙය්ය. භගවතො සුත්වා භික්ඛූ ධාරෙස්සන්තීති.

තෙන හානන්ද, සුණාහි -පෙ- යාවතා ආනන්ද, චන්දිමසුරියා පරිහරන්ති, දිසා භන්ති විරොචනා, තාව සහස්සධා ලොකො. තස්මිං සහස්සධා ලොකෙ සහස්සං චන්දානං, සහස්සං සුරියානං, සහස්සං සිනෙරුපබ්බතරාජානං, සහස්සං ජම්බුදීපානං, සහස්සං අපරගොයානානං, සහස්සං උත්තරකුරූනං, සහස්සං පුබ්බවිදෙහානං, චත්තාරි මහාසමුද්දසහස්සානි, චත්තාරි මහාරාජසහස්සානි, සහස්සං චාතුම්මහාරාජිකානං, සහස්සං තාවතිංසානං, සහස්සං යාමානං, සහස්සං තුසිතානං, සහස්සං නිම්මාණරතීනං, සහස්සං පරනිම්මිතවසවත්තීනං, සහස්සං බ්රහ්මලොකානං. අයං වුච්චතානන්ද, සහස්සී චූළනිකා ලොකධාතු.

යාවතානන්ද සහස්සී චූළනිකා ලොකධාතු, තාව සහස්සධා ලොකො. අයං වුච්චතානන්ද, ද්විසහස්සී මජ්ඣිමිකා ලොකධාතු.

යාවතා ආනන්ද, ද්විසහස්සී මජ්ඣිමිකා ලොකධාතු, තාව සහස්සධා ලොකො. අයං වුච්චතානන්ද තිසහස්සී මහාසහස්සී ලොකධාතු.

ආකඞ්ඛමානො ආනන්ද, තථාගතො තිසහස්සීමහාසහස්සීලොකධාතුං සරෙන විඤ්ඤාපෙය්ය, යාවතා පන ආකඞ්ඛෙය්යාති?

යථා කථම්පන භන්තෙ, භගවා තිසහස්සීමහාසහස්සීලොකධාතුං සරෙන විඤ්ඤාපෙය්ය, යාවතා පන ආකඞ්ඛෙය්යාති.

ඉධානන්ද තථාගතො තිසහස්සීමහාසහස්සීලොකධාතුං ඔභාසෙන ඵරෙය්ය. යදා තෙ සත්තා තං ආලොකං සඤ්ජානෙය්යුං, අථ තථාගතො ඝොසං කරෙය්ය සද්දමනුස්සාවෙය්ය. එවං ඛො ආනන්ද, තථාගතො තිසහස්සීමහාසහස්සීලොකධාතුං සරෙන විඤ්ඤාපෙය්ය, යාවතා පන ආකඞ්ඛෙය්යාති.

එවං වුත්තෙ ආයස්මා ආනන්දො භගවන්තං එතදවොච : ලාභා වත මෙ, සුලද්ධං වත මෙ, යස්ස මෙ සත්ථා එවං මහිද්ධිකො එවං මහානුභාවොති.

එවං වුත්තෙ ආයස්මා උදායී ආයස්මන්තං ආනන්දං එතදවොච : කිං තුම්හෙත්ථ, ආවුසො ආනන්ද, යදි තෙ සත්ථා එවං මහිද්ධිකො එවං මහානුභාවොති?

එවං වුත්තෙ භගවා ආයස්මන්තං උදායිං එතදවොච : මා හෙවං උදායි, මා හෙවං උදායි. සචෙ උදායි, ආනන්දො අවීතරාගො කාලං කරෙය්ය, තෙන චිත්තප්පසාදෙන සත්තක්ඛත්තුං දෙවෙසු දෙවරජ්ජං කරෙය්ය, සත්තක්ඛත්තුං ඉමස්මිඤ්ඤෙව ජම්බුදීපෙ මහාරජ්ජං කරෙය්ය. අපි උදායි, ආනන්දො දිට්ඨෙව ධම්මෙ පරිනිබ්බායිස්සතීති.