17. තීණිමානි භික්ඛවෙ, කථාවත්ථූනි. කතමානි තීණි : අතීතං වා භික්ඛවෙ, අද්ධානං ආරබ්භ කථං කථෙය්ය එවං අහොසි අතීතමද්ධානන්ති. අනාගතං වා භික්ඛවෙ, අද්ධානං ආරබ්භ කථං කථෙය්ය එවං භවිස්සති අනාගතමද්ධානන්ති. එතරහි වා භික්ඛවෙ, පච්චුප්පන්නං ආරබ්භ කථං කථෙය්ය එවං එතරහි පච්චුප්පන්නන්ති.

කථාසම්පයොගෙන භික්ඛවෙ, පුග්ගලො වෙදිතබ්බො, යදි වා කච්ඡො, යදි වා අකච්ඡොති. සචායං භික්ඛවෙ, පුග්ගලො පඤ්හං පුට්ඨො සමානො එකංසව්යාකරණීයං පඤ්හං න එකංසෙන ව්යාකරොති, විභජ්ජ ව්යාකරණීයං පඤ්හං න විභජ්ජ ව්යාකරොති, පටිපුච්ඡා ව්යාකරණීයං පඤ්හං න පටිපුච්ඡා ව්යාකරොති, ඨපනීයං පඤ්හං න ඨපෙති, එවං සන්තායං භික්ඛවෙ, පුග්ගලො අකච්ඡො හොති.

සචෙ පනායං භික්ඛවෙ, පුග්ගලො පඤ්හං පුට්ඨො සමානො එකංසව්යාකරණීයං පඤ්හං එකංසෙන ව්යාකරොති, විභජ්ජ ව්යාකරණීයං පඤ්හං විභජ්ජ ව්යාකරොති, පටිපුච්ඡා ව්යාකරණීයං පඤ්හං පටිපුච්ඡා ව්යාකරොති , ඨපනීයං පඤ්හං ඨපෙති, එවං සන්තායං භික්ඛවෙ, පුග්ගලො කච්ඡො හොති.

කථාසම්පයොගෙන භික්ඛවෙ, පුග්ගලො වෙදිතබ්බො යදි වා කච්ඡො, යදි වා අකච්ඡොති. සචායං භික්ඛවෙ, පුග්ගලො පඤ්හං පුට්ඨො සමානො ඨානාඨානෙ න සණ්ඨාති, පරිකප්පෙ න සණ්ඨාති, අඤ්ඤවාදෙ න සණ්ඨාති, පටිපදාය න සණ්ඨාති, එවං සන්තායං භික්ඛවෙ, පුග්ගලො අකච්ඡො හොති.

සචෙ පනායං භික්ඛවෙ, පුග්ගලො පඤ්හං පුට්ඨො සමානො ඨානාඨානෙ සණ්ඨාති, පරිකප්පෙ සණ්ඨාති, අඤ්ඤවාදෙ සණ්ඨාති, පටිපදාය සණ්ඨාති, එවං සන්තායං භික්ඛවෙ, පුග්ගලො කච්ඡො හොති.

කථාසම්පයොගෙන භික්ඛවෙ, පුග්ගලො වෙදිතබ්බො යදි වා කච්ඡො යදි වා අකච්ඡොති. සචායං භික්ඛවෙ, පුග්ගලො පඤ්හං පුට්ඨො සමානො අඤ්ඤෙනඤ්ඤං පටිචරති, බහිද්ධා කථං අපනාමෙති, කොපඤ්ච දොසඤ්ච අප්පච්චයඤ්ච පාතුකරොති, එවං සන්තායං භික්ඛවෙ, පුග්ගලො අකච්ඡො හොති.

සචෙ පනායං භික්ඛවෙ, පුග්ගලො පඤ්හං පුට්ඨො සමානො නාඤ්ඤෙනාඤ්ඤං පටිචරති. න බහිද්ධා කථං අපනාමෙති, න කොපඤ්ච දොසඤ්ච අප්පච්චයඤ්ච පාතුකරොති, එවං සන්තායං භික්ඛවෙ, පුග්ගලො කච්ඡො හොති.

කථාසම්පයොගෙන භික්ඛවෙ, පුග්ගලො වෙදිතබ්බො යදි වා කච්ඡො, යදි වා අකච්ඡොති.

සචායං භික්ඛවෙ, පුග්ගලො පඤ්හං පුට්ඨො සමානො අභිහරති, අභිමද්දති, අනුපජග්ඝති ඛලිතං ගණ්හාති, එවං සන්තායං භික්ඛවෙ, පුග්ගලො අකච්ඡො හොති.

සචෙ පනායං භික්ඛවෙ, පුග්ගලො පඤ්හං පුට්ඨො සමානො න අභිහරති, න අභිමද්දති, න අනුපජග්ඝති, න ඛලිතං ගණ්හාති, එවං සන්තායං භික්ඛවෙ, පුග්ගලො කච්ඡො හොති.

කථාසම්පයොගෙන භික්ඛවෙ, පුග්ගලො වෙදිතබ්බො යදි වා සඋපනිසො යදි වා අනුපනිසොති.

අනොහිතසොතො භික්ඛවෙ, අනුපනිසො හොති, ඔහිතසොතො සඋපනිසො හොති. සො සඋපනිසො සමානො අභිජානාති එකං ධම්මං, පරිජානාති එකං ධම්මං, පජහති එකං ධම්මං, සච්ඡිකරොති එකං ධම්මං. සො අභිජානන්තො එකං ධම්මං, පරිජානන්තො එකං ධම්මං, පජහන්තො එකං ධම්මං, සච්ඡිකරොන්තො එකං ධම්මං, සම්මාවිමුත්තිං ඵුසති.

එතදත්ථා භික්ඛවෙ, කථා, එතදත්ථා මන්තනා, එතදත්ථා උපනිසා, එතදත්ථං සොතාවධානං, යදිදං අනුපාදා චිත්තස්ස විමොක්ඛොති.