එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.

අථ ඛො ආයස්මා ආනන්දො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා ආනන්දො භගවන්තං එතදවොච:

කිමත්ථියානි භන්තෙ කුසලානි සීලානි කිමානිසංසානීති. අවිප්පටිසාරත්ථානි ඛො ආනන්ද කුසලානි සීලානි අවිප්පටිසාරානිසංසානීති.

අවිප්පටිසාරො පන භන්තෙ කිමත්ථියො කිමානිසංසොති? අවිප්පටිසාරො ඛො ආනන්ද පාමොජ්ජත්ථො පාමොජ්ජානිසංසො.

පාමොජ්ජං පන භන්තෙ කිමත්ථියං කිමානිසංසන්ති: පාමොජ්ජං ඛො ආනන්ද පීතත්ථං පීතානිසංසං.

පීති පන භන්තෙ කිමත්ථියා කිමානිසංසාති. පීති ඛො ආනන්ද පස්සද්ධත්ථා පස්සද්ධානිසංසා.

පස්සද්ධි පන භන්තෙ කිමත්ථියා කිමානිසංසාති? පස්සද්ධි ඛො ආනන්ද සුඛත්ථා සුඛානිසංසා.

සුඛං පන භන්තෙ කිමත්ථියං කිමානිසංසන්ති? සුඛං ඛො ආනන්ද සමාධත්ථං සමාධානිසංසං.

සමාධි පන භන්තෙ කිමත්ථො කිමානිසංසොති? සමාධි ඛො ආනන්ද යථාභූතඤාණදස්සනත්ථො යථාභූතඤාණදස්සනානිසංසො.

යථාභූතඤාණදස්සනං පන භන්තෙ කිමත්ථියං කිමානිසංසන්ති? යථාභූතඤාණදස්සනං ඛො ආනන්ද නිබ්බින්දනත්ථං නිබ්බිදානිසංසං.

නිබ්බිදා පන භන්තෙ කිමත්ථො කිමානිසංසාති? නිබ්බිදා ඛො ආනන්ද විරාගත්ථා විරාගානිසංසා.

විරාගො පන භන්තෙ කිමත්ථො කිමානිසංසොති? විරාගො ඛො ආනන්ද විමුත්තිඤාණදස්සනත්ථො විමුත්තිඤාණදස්සනානිසංසොති.

ඉති ඛො ආනන්ද කුසලානි සීලානි අවිප්පටිසාරත්ථානි, අවිප්පටිසාරානිසංසානි. අවිප්පටිසාරො පාමොජ්ජත්ථො පාමොජ්ජානිසංසො. පාමොජ්ජං පීතත්ථං පීතානිසංසං. පීති පස්සද්ධත්ථා පස්සද්ධානිසංසා. පස්සද්ධි සුඛත්ථා සුඛානිසංසා. සුඛං සමාධත්ථං සමාධානිසංසං. සමාධි යථාභූතඤාණදස්සනත්ථො යථාභූතඤාණදස්සනානිසංසො. යථාභූතඤාණදස්සනා නිබ්බින්දත්ථං නිබ්බිදානිසංසං, නිබ්බිදා විරාගත්ථා විරාගානිසංසා, විරාගො විමුත්තිඤාණදස්සනත්ථො විමුත්තිඤාණදස්සනානිසංසො. ඉති ඛො ආනන්ද කුසලානි සීලානි අනුපුබ්බෙන අග්ගාය පරෙන්තීති.

සීලවතො භික්ඛවෙ සීලසම්පන්නස්ස න චෙතනාය කරණීයං ‘අවිප්පටිසාරො මෙ උප්පජ්ජතූ’ති. ධම්මතා ඛො එසා භික්ඛවෙ යං සීලවතො සීලසම්පන්නස්ස අවිප්පටිසාරො උප්පජ්ජති.

අවිප්පටිසාරිස්ස භික්ඛවෙ න චෙතනාය කරණීයං ‘පාමොජ්ජං මෙ උප්පජ්ජතූ’ති. ධම්මතා එසා භික්ඛවෙ යං අවිප්පටිසාරිස්ස පාමොජ්ජං උප්පජ්ජති.