එතදග්ගං භික්ඛවෙ මම සාවකානං භික්ඛූනං රත්තඤ්ඤූනං යදිදං අඤ්ඤාකොණ්ඩඤ්ඤො -පෙ- මහාපඤ්ඤානං යදිදං සාරිපුත්තො, -පෙ- ඉද්ධිමන්තානං යදිදං මහාමොග්ගල්ලානො, -පෙ- ධුතවාදානං යදිදං මහාකස්සපො, -පෙ- දිබ්බචක්ඛුකානං යදිදං අනුරුද්ධො, -පෙ- උච්චාකුලිකානං යදිදං භද්දියො කාළිගොධායපුත්තො, -පෙ- මඤ්ජුස්සරානං යදිදං ලකුණ්ටකභද්දියො, -පෙ- සීහනාදිකානං යදිදං පිණ්ඩොලභාරද්වාජො, -පෙ- ධම්මකථිකානං යදිදං පුණ්ණො මන්තාණිපුත්තො, -පෙ- සංඛිත්තෙන භාසිතස්ස විත්ථාරෙන අත්ථං විභජන්තානං යදිදං මහාකච්චානොති.

එතදග්ගං භික්ඛවෙ මම සාවකානං භික්ඛූනං මනොමයං කායං අභිනිම්මිණන්තානං යදිදං චුල්ලපන්ථකො, චෙතොවිවට්ටකුසලානං යදිදං චුල්ලපන්ථකො, -පෙ- සඤ්ඤාවිවට්ටකුසලානං යදිදං මහාපන්ථකො, -පෙ- අරණවිහාරීනං යදිදං සුභූති, -පෙ- දක්ඛිණෙය්යානං යදිදං සුභූති, -පෙ- ආරඤ්ඤකානං යදිදං රෙවතො ඛදිරවනියො, -පෙ- ඣායීනං යදිදං කඞ්ඛාරෙවතො, -පෙ- ආරද්ධවිරියානං යදිදං සොණො කොළිවීසො, -පෙ- කල්යාණවාක්කරණානං යදිදං සොණො කුටිකණ්ණො, -පෙ- ලාභීනං යදිදං සීවලී, -පෙ- සද්ධාධිමුත්තානං යදිදං වක්කලීති.

එතදග්ගං භික්ඛවෙ මම සාවකානං භික්ඛූනං සික්ඛාකාමානං යදිදං රාහුලො, -පෙ- සද්ධාපබ්බජිතානං යදිදං රට්ඨපාලො, -පෙ- පඨමං සලාකං ගණ්හන්තානං යදිදං කුණ්ඩධානො, -පෙ- පටිභානවන්තානං යදිදං වඞ්ගීසො, -පෙ- සමන්තපාසාදිකානං යදිදං උපසෙනො වඞ්ගන්තපුත්තො, -පෙ- සෙනාසනපඤ්ඤාපකානං යදිදං දබ්බො මල්ලපුත්තො -පෙ- දෙවතානං පියමනාපානං යදිදං පිළින්දිවච්ඡො, -පෙ- ඛිප්පාභිඤ්ඤානං යදිදං බාහියො දාරුචීරියො, -පෙ- චිත්තකථිකානං යදිදං කුමාරකස්සපො, -පෙ- පටිසම්භිදාපත්තානං යදිදං මහාකොට්ඨිතොති.

එතදග්ගං භික්ඛවෙ මම සාවකානං භික්ඛූනං බහුස්සුතානං යදිදං ආනන්දො, -පෙ- සතිමන්තානං යදිදං ආනන්දො, -පෙ- ගතිමන්තානං යදිදං ආනන්දො, -පෙ- ධිතිමන්තානං යදිදං ආනන්දො, -පෙ- උපට්ඨාකානං යදිදං ආනන්දො, -පෙ- මහාපරිසානං යදිදං උරුවෙලකස්සපො, -පෙ- කුලප්පසාදකානං යදිදං කාළුදායී, -පෙ- අප්පාබාධානං යදිදං බක්කුලො, -පෙ- පුබ්බෙනිවාසං අනුස්සරන්තානං යදිදං සොභිතො, -පෙ- විනයධරානං යදිදං උපාලි, -පෙ- භික්ඛුනොවාදකානං යදිදං නන්දකො, -පෙ- ඉන්ද්රියෙසු ගුත්තද්වාරානං යදිදං නන්දො, -පෙ- භික්ඛුඔවාදකානං යදිදං මහාකප්පිනො, -පෙ- තෙජොධාතුකුසලානං යදිදං සාගතො, -පෙ- පටිභානෙය්යකානං යදිදං රාධො, -පෙ- ලූඛචීවරධරානං යදිදං මොඝරාජාති.