1017. පිසුනෙන ච කොධනෙන ච මච්ඡරිනා ච විභූතනන්දිනා,
සඛිතං න කරෙය්ය පණ්ඩිතො පාපො කාපුරිසෙන සඞ්ගමො.

1018. සද්ධෙන ච පෙසලෙන ච පඤ්ඤවතා බහුස්සුතෙන ච,
සඛිතං හි කරෙය්ය පණ්ඩිතො භද්දො සප්පුරිසෙන සඞ්ගමො.

1019. පස්ස චිත්තකතං බිම්බං අරුකායං සමුස්සිතං,
ආතුරං බහුසඞ්කප්පං යස්ස නත්ථි ධුවං ඨිති.

1020. පස්ස චිත්තකතං රූපං මණිනා කුණ්ඩලෙන ච,
අට්ඨිං තචෙන ඔනද්ධං සහ වත්ථෙන සොභති.

1021. අලත්තකකතා පාදා මුඛං චුණ්ණකමක්ඛිතං,
අලං බාලස්ස මොහාය නො ච පාරගවෙසිනො.

1022. අට්ඨපාදකතා කෙසා නෙත්තා අඤ්ජනමක්ඛිතා,
අලං බාලස්ස මොහාය නො ච පාරගවෙසිනො.

1023. අඤ්ජනීව නවා චිත්තා පූතිකායො අලඞ්කතො,
අලං බාලස්ස මොහාය නො ච පාරගවෙසිනො.

1024. ඔදහි මිගවො පාසං නාසදා වාගුරං මිගො,
භුත්වා නිවාපං ගච්ඡාම කන්දන්තෙ මිගබන්ධකෙ.

1025. ඡින්නා පාසා මිගවස්ස නාසදා වාගුරං මිගො,
භුත්වා නිවාපං ගච්ඡාම සොචන්තෙ මිගලුද්දකෙ.

1026. බහුස්සුතො චිත්තකථී බුද්ධස්ස පරිචාරකො,
පන්නභාරො විසඤ්ඤුත්තො සෙය්යං කප්පෙති ගොතමො.

1027. ඛීණාසවො විසඤ්ඤුත්තො සඞ්ගාතීතො සුනිබ්බුතො,
ධාරෙති අන්තිමං දෙහං ජාතිමරණපාරගූ.

1028. යස්මිං පතිට්ඨිතා ධම්මා බුද්ධස්සාදිච්චබන්ධුනො,
නිබ්බානගමනෙ මග්ගෙ සො’යං තිට්ඨති ගොතමො.

1029. ද්වාසීතිං බුද්ධතො ගණ්හිං ද්වෙ සහස්සානි භික්ඛුතො,
චතුරාසීතිසහස්සානි යෙ මෙ ධම්මා පවත්තිනො.

1030. අප්පස්සුතා’යං පුරිසො බලිවද්දො’ව ජීරති,
මංසානි තස්ස වඩ්ඪති පඤ්ඤා තස්ස න වඩ්ඪති.

1031. බහුස්සුතො අප්පස්සුතං යො සුතෙනාතිමඤ්ඤති,
අන්ධො පදීපධාරො’ව තථෙව පටිභාති මං.

1032. බහුස්සුතං උපාසෙය්ය සුතං ච න විනාසයෙ,
තං මූලං බ්රහ්මචරියස්ස තස්මා ධම්මධරො සියා.

1033. පුබ්බාපරඤ්ඤූ අත්ථඤ්ඤූ නිරුත්තිපදකොවිදො,
සුග්ගහීතං ච ගණ්හාති අත්ථං චොපපරික්ඛති.

1034. ඛන්ත්යා ඡන්දීකතො හොති උස්සහිත්වා තුලෙති තං,
සමයෙ සො පදහති අජ්ඣත්තං සුසමාහිතො.

1035. බහුස්සුතං ධම්මධරං සප්පඤ්ඤං බුද්ධසාවකං,
ධම්මවිඤ්ඤාණමාකඞ්ඛං තං භජෙථ තථාවිධං.

1036. බහුස්සුතො ධම්මධරො කොසාරක්ඛො මහෙසිනො,
චක්ඛු සබ්බස්ස ලොකස්ස පූජනීයො බහුස්සුතො.

1037. ධම්මාරාමො ධම්මරතො ධම්මං අනුවිචින්තයං,
ධම්මං අනුස්සරං භික්ඛු සද්ධම්මා න පරිහායති.

1038. කායමච්ඡෙරගරුනො හිය්යමානෙ අනුට්ඨහෙ,
සරීරසුඛගිද්ධස්ස කුතො සමණඵාසුතා.

1039. න පක්ඛන්ති දිසා සබ්බා ධම්මා නප්පටිභන්ති මං,
ගතෙ කල්යාණමිත්තම්හි අන්ධකාරංව ඛායති.

1040. අබ්භතීතසහායස්ස අතීතගතසත්ථුනො,
නත්ථි එතාදිසං මිත්තං යථා කායගතා සති.