9.(154) ගහකාරක දිට්ඨො’සි පුන ගෙහං න කාහසි
සබ්බා තෙ ඵාසුකා භග්ගා ගහකූටං විසඞ්ඛිතං
විසඞ්ඛාරගතං චිත්තං තණ්හානං ඛයමජ්ඣගා.

10.(155) අචරිත්වා බ්රහ්මචරියං අලද්ධා යොබ්බනෙ ධනං
ජිණ්ණකොඤ්චාව ඣායන්ති ඛීණමච්ඡෙව පල්ලලෙ.

11.(156) අචරිත්වා බ්රහ්මචරියං අලද්ධා යොබ්බනෙ ධනං
සෙන්ති චාපා’තිඛිත්තා’ව පුරාණානි අනුත්ථුනං.

1.(157) අත්තානං චෙ පියං ජඤ්ඤා රක්ඛෙය්ය නං සුරක්ඛිතං
තිණ්ණමඤ්ඤතරං යාමං පටිජග්ගෙය්ය පණ්ඩිතො.

2.(158) අත්තානමෙව පඨමං පතිරූපෙ නිවෙසයෙ
අථඤ්ඤමනුසාසෙය්ය න කිලිස්සෙය්ය පණ්ඩිතො.

3.(159) අත්තානඤ්චෙ තථා කයිරා යථඤ්ඤමනුසාසති
සුදන්තො වත දම්මෙථ අත්තා හි කිර දුද්දමො.

4.(160) අත්තා හි අත්තනො නාථො කො හි නාථො පරො සියා
අත්තනා’ව සුදන්තෙන නාථං ලභති දුල්ලභං.

5.(161) අත්තනා’ව කතං පාපං අත්තජං අත්තසම්භවං
අභිමන්ථති දුම්මෙධං වජිරං’වස්මමයං මණිං.

6.(162) යස්ස අච්චන්තදුස්සීල්යං මාලුවා සාලමිවොතතං
කරොති සො තථත්තානං යථා නං ඉච්ඡතී දිසො.

7.(163) සුකරානි අසාධූනි අත්තනො අහිතානි ච
යං වෙ හිතඤ්ච සාධුං ච තං වෙ පරමදුක්කරං.

8.(164) යො සාසනං අරහතං අරියානං ධම්මජීවිනං
පටික්කොසති දුම්මෙධො දිට්ඨිං නිස්සාය පාපිකං
ඵලානි කට්ඨකස්සෙව අත්තඝඤ්ඤාය ඵල්ලති.

9.(165) අත්තනා’ව කතං පාපං අත්තනා සංකිලිස්සති
අත්තනා අකතං පාපං අත්තනාව විසුජ්ඣති
සුද්ධි අසුද්ධි පච්චත්තං නාඤ්ඤමඤ්ඤො විසොධයෙ.

10.(166) අත්තදත්ථං පරත්ථෙන බහුනාපි න හාපයෙ
අත්තදත්ථමභිඤ්ඤාය සදත්ථපසුතො සියා.

1.(167) හීනං ධම්මං න සෙවෙය්ය පමාදෙන න සංවසෙ
මිච්ඡාදිට්ඨිං න සෙවෙය්ය න සියා ලොකවද්ධනො.

2.(168) උත්තිට්ඨෙ නප්පමජ්ජෙය්ය ධම්මං සුචරිතං චරෙ
ධම්මචාරී සුඛං සෙති අස්මිං ලොකෙ පරම්හි ච.