7. 2. 1. 9.
[මාපුඤ්ඤභායි සුත්තං]
[සාවත්ථිනිදානං]
9. මා භික්ඛවෙ, පුඤ්ඤානං භායිත්ථ. සුඛස්සෙතං භික්ඛවෙ, අධිවචනං යදිදං පුඤ්ඤන්ති.
අභිජානාමි ඛො පනාහං භික්ඛවෙ, දීඝරත්තං කතානං පුඤ්ඤානං දීඝරත්තං ඉට්ඨං කන්තං මනාපං විපාකං පච්චනුභූතං. සත්තවස්සානි මෙත්තං චිත්තං භාවෙසිං. සත්තවස්සානි මෙත්තං චිත්තං භාවෙත්වා සත්තසංවට්ටවිවට්ටකප්පෙ නයිමං ලොකං පුනරාගමාසිං. සංවට්ටමානස්සුදාහං භික්ඛවෙ, ලොකෙ ආභස්සරූපගො හොමි. විවට්ටමානෙ ලොකෙ සුඤ්ඤං බ්රහ්මවිමානං උපපජ්ජාමි. තත්ර සුදං භික්ඛවෙ, (සත්තක්ඛත්තුං) බ්රහ්මා හොමි මහාබ්රහ්මා අභිභූ අනභිභූතො අඤ්ඤදත්ථු දසො වසවත්තී. ඡත්තිංසක්ඛත්තුං ඛො පනාහං භික්ඛවෙ සක්කො අහොසිං දෙවානමින්දො. අනෙකසතක්ඛත්තුං රාජා අහොසිං චක්කවත්ති ධම්මිකො ධම්මරාජා චාතුරන්තො විජිතාවී ජනපදත්ථාවරියප්පත්තො සත්තරතනසමන්නාගතො. තස්ස මය්හං භික්ඛවෙ, ඉමානි සත්තරතනානි අහෙසුං. සෙය්යථීදං: චක්කරතනං හත්ථිරතනං අස්සරතනං මණිරතනං ඉත්ථිරතනං ගහපතිරතනං පරිනායකරතනමෙව සත්තමං. පරොසහස්සං ඛො පන මෙ භික්ඛවෙ, පුත්තා අහෙසුං සූරා වීරඞ්ගරූපා පරසෙනප්පමද්දනා. සොහං ඉමං පඨවිං සාගරපරියන්තං අදණ්ඩෙන අසත්ථෙන ධම්මෙන අභිවිජිය අජ්ඣාවසින්ති.
41. පස්ස පුඤ්ඤානං විපාකං කුසලානං සුඛෙසිනො
මෙත්තං චිත්තං විභාවෙත්වා සත්තවස්සානි භික්ඛවෙ,
සත්ත සංවට්ට-විවට්ටකප්පෙ නයිමං ලොකං පුනාගමං.
42. සංවට්ටමානෙ ලොකම්හි හොමි ආභස්සරූපගො,
විවට්ටමානෙ ලොකම්හි සුඤ්ඤං බ්රහ්මූපගො අහුං.
43. සත්තක්ඛත්තුං මහාබ්රහ්මා වසවත්තී තදා අහුං.
ඡත්තිංසක්ඛත්තුං දෙවින්දො දෙවරජ්ජමකාරයිං.
44. චක්කවත්තී අහුං රාජා ජම්බුදීපස්ස ඉස්සරො
මුද්ධාවසිත්තො ඛත්තියො මනුස්සාධිපතී අහුං.
45. අදණ්ඩෙන අසත්ථෙන විජෙය්ය පඨවිං ඉමං
අසාහසෙන ධම්මෙන සමෙන අනුසාසියං.
46. ධම්මෙන රජ්ජං කාරෙත්වා අස්මිං පඨවිමණ්ඩලෙ
මහද්ධනෙ මහාභොගෙ අඩ්ඪෙ අජායිසං කුලෙ
47. සබ්බකාමෙහි සම්පන්නො රතනෙහි ච සත්තහි,
බුද්ධා සඞ්ගාහකා ලොකෙ තෙහි එතං සුදෙසිතං.
48. එස හෙතුමහන්තස්ස පථව්යො යෙන වුච්චති.
පහූතවිත්තූපකරණො රාජා හොමි පතාපවා
49. ඉද්ධිමා යසවා හොමි ජම්බුසණ්ඩස්ස ඉස්සරො.
කො සුත්වා නප්පසීදෙය්ය අපි කණ්හාභිජාතියො.
50. තස්මා හි අත්ථකාමෙන මහත්තමභිකඞ්ඛතා
සද්ධම්මො ගරුකාතබ්බො සරං බුද්ධාන සාසනං.
7. 2. 1. 10.
[සත්තභරියා සුත්තං]
10. එකං සමයං භගවා සාවත්ථියං විහරති ජෙතවනෙ අනාථ පිණ්ඩිකස්ස ආරාමෙ. අථ ඛො භගවා පුබ්බන්හසමයං නිවාසෙත්වා පත්තචීවරං ආදාය යෙන අනාථපිණ්ඩිකස්ස ගහපතිස්ස නිවෙසනං තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි.
තෙන ඛො පන සමයෙන අනාථපිණ්ඩිකස්ස ගහපතිස්ස නිවෙසනෙ මනුස්සා උච්චාසද්දා මහාසද්දා හොන්ති. අථ ඛො අනාථපිණ්ඩිකො ගහපති යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො අනාථපිණ්ඩිකං ගහපතිං භගවා එතදවොච:
කින්නු තෙ ගහපති නිවෙසනෙ මනුස්සා උච්චාසද්දා මහාසද්දා, කෙවට්ටා මඤ්ඤෙ මච්ඡවිලොපෙති?
අයං භන්තෙ, සුජාතා ඝරසුණ්හා අඩ්ඪා අඩ්ඪකුලා ආනීතා. සා නෙව සස්සුං ආදියති. න සසුරං ආදියති. න සාමිකං ආදියති. භගවන්තම්පි න සක්කරොති, න ගරුකරොති න මානෙති, න පූජෙතීති.
අථ ඛො භගවා සුජාතං ඝරසුණ්හං ආමන්තෙසි එහි සුජාතෙති. එවම්භන්තෙති ඛො සුජාතා ඝරසුණ්හා භගවතො පටිස්සුත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො සුජාතං ඝරසුණ්හං භගවා එතදවොච:
සත්ත ඛො ඉමා සුජාතෙ, පුරිසස්ස භරියායො. කතමා සත්ත:
වධකසමා, චොරිසමා, අය්යසමා, මාතුසමා, භගිනිසමා, සඛීසමා, දාසීසමා, ඉමා ඛො සුජාතෙ, සත්ත පුරිසස්ස භරියායො
තාසං ත්වං කතමාති.
න ඛො අහං භන්තෙ, ඉමස්ස භගවතා සඞ්ඛිත්තෙන භාසිතස්ස විත්ථාරෙන අත්ථං ආජානාමි.